സുശാന്ത്​ സിങ്​ മയക്കുമരുന്ന്​ കേസിൽ റിയയും ഷോവിക്കുമുൾപെടെ 33 പേരെ പ്രതികളാക്കി കുറ്റപത്രം

മുംബൈ: മുംബൈയിലെ ഫ്ലാറ്റിൽ ആത്​മഹത്യ ചെയ്​ത നിലയിൽ കണ്ടെത്തിയ ബോളിവുഡ്​ നടൻ സുശാന്ത്​ സിങ്​ രജ്​പുതിന്‍റെ മരണവുമായി ബന്ധപ്പെട്ട മയക്കുമരുന്ന്​ കേസിൽ നടി റിയ ചക്രവർത്തി, സഹോദരൻ ഷോവിക്​ ചക്രവർത്തി, സുശാന്തിന്‍റെ വീട്ടുവേലക്കാരൻ തുടങ്ങി 33 പേരെ പ്രതികളാക്കി നാർകോട്ടിക്​സ്​ കൺട്രോൾ ബ്യൂറോ കുറ്റപത്രം സമർപിച്ചു. 2020 ജൂണിൽ സുശാന്ത്​ മരിച്ച്​​ ഒമ്പതു മാസത്തോളം കഴിഞ്ഞാണ്​ മുംബൈയിലെ പ്രത്യേക കോടതിക്കു മുമ്പാകെ കുറ്റപത്രം സമർപ്പിക്കുന്നത്​. കഴിഞ്ഞ വർഷം ആഗസ്റ്റിൽ എഫ്​.ഐ.ആർ സമർപിച്ചിരുന്നു. ഇതു കഴിഞ്ഞ്​ ആറു മാസത്തിനിടെ കുറ്റപത്രം സമർപിച്ചിരിക്കണമെന്നാണ്​ വ്യവസ്​ഥ.

12,000 പേജുള്ള കുറ്റപത്രത്തിൽ 200 ഓളം പേരുടെ സാക്ഷിമൊഴികൾ രേഖപ്പെടുത്തിയിട്ടുണ്ട്​. ഡിജിറ്റൽ രൂപത്തിലാക്കി കോടതിയിൽ സമർപിച്ച കുറ്റപത്രത്തിന്‍റെ പ്രതി കുറ്റം ചുമത്തപ്പെട്ടവർക്കും കൈമാറും.

കഴിഞ്ഞ ജൂണിൽ സുശാന്ത്​ സിങ്​ മരിച്ച സംഭവവുമായി ബന്ധപ്പെട്ട്​ റിയയെയും ഷോവികിനെയും പൊലീസ്​ അറസ്റ്റ്​ ചെയ്​ത്​ വിട്ടിരുന്നു. പ്രതി ചേർക്കപ്പെട്ട 33 പേരിൽ എട്ടു പേർ ഇപ്പോഴും ജുഡീഷ്യൽ കസ്റ്റഡിയിലാണ്​.

അന്വേഷണത്തിനിടെ വിദേശ കറൻസി, ഇലക്​ട്രോണിക്​ ഉപകരണങ്ങൾ എന്നിവയുൾപെടെ അന്വേഷണ സംഘം കസ്റ്റഡിയിലെടുത്തിരുന്നു. വിവിധ മയക്കുമരുന്നുകളും പിടിച്ചെടുത്തു.

പ്രതിക​ൾക്കെതിരെ കുറ്റം ചുമത്താവുന്ന തെളിവുകൾ കുറ്റപത്രത്തിൽ സമർപ്പിച്ചിട്ടുണ്ടെന്ന്​ ഏജൻസി വ്യക്​തമാക്കി. നടന്​ മയക്കുമരുന്ന്​ കൈമാറിയെന്ന്​ സംശയിക്കുന്ന സ്വകാര്യ വാട്​സാപ്​ ചാറ്റുകൾ എൻഫോഴ്​സ്​മെന്‍റ്​ ഡയറക്​ടറേറ്റ്​ നേരത്തെ സമർപിച്ചിരുന്നു. റിയ ചക്രവർത്തി, ഷോവിക്​ എന്നിവരുടെതും സുശാന്തിന്‍റെ സ്റ്റാഫിന്‍റെയും ചാറ്റുകളാണ്​ അന്വേഷണ സംഘത്തിന്​ ലഭിച്ചത്​.

സുശാന്ത്​ മരണം അന്വേഷിച്ച മയക്കുമരുന്ന്​ നിയന്ത്രണ ഏജൻസി സിനിമ വ്യവസായത്തിന്​ മയക്കുമരുന്ന്​ ലോബിയുമായുള്ള ബന്ധമാണ്​പ്രധാനമായി അന്വേഷിച്ചിരുന്നത്​. ഇതേ തുടർന്ന്​, ദീപിക പദുകോൺ, സാറ അലി ഖാൻ, അർജുൻ രാംപാൽ, ശ്രദ്ധ കപൂർ തുടങ്ങി നിരവധി പേരെ ചോദ്യം ചെയ്​തു. മഹാരാഷ്​ട്ര മന്ത്രി നവാബ്​ മലികിന്‍റെ മരുമകൻ സമീർ ഖാനെയും അറസ്റ്റ്​ ചെയ്​തിരുന്നു. മഹാരാഷ്​ട്രയിൽ നിരവധി ഇടങ്ങളിൽ റെയ്​ഡ്​ നടത്തുകയും ചെയ്​തു.