ഗസ്സയെ കുറിച്ച് വിവാദ ട്വീറ്റുമായി സംവിധായകൻ രാംഗോപാൽ വർമ; ഇത്തരമൊന്ന് ഒരിക്കലും പ്രതീക്ഷിച്ചിരുന്നില്ലെന്ന് പ്രമുഖർ

ഹൈദരാബാദ്: വെടിനിർത്തൽ കരാറിൽ ഒപ്പു​വെച്ചിട്ടും ഇസ്രായേൽ വംശഹത്യ തുടരുന്ന ഗസ്സയെ കുറിച്ച് വിവാദ ട്വീറ്റുമായി ബോളിവുഡിലെ മുൻനിര സംവിധായകരിലൊരാളായ രാംഗോപാൽ വർമ. വിവിധ വിഷയങ്ങളിൽ വ്യത്യസ്തവും ധീരവുമായ പ്രതികരണങ്ങളിലൂടെ ശ്രദ്ധേയനായ വർമയു​ടെ പുതിയ ട്വീറ്റ്, സാമൂഹികപ്രവർത്തകരുടെയും എഴുത്തുകാരുടെയും കടുത്ത വിമർശനത്തിനിടയാക്കി.

‘ഇന്ത്യയിൽ ഒരു ദിവസം മാത്രമേ ദീപാവലി ഉള്ളൂ, ഗസ്സയിൽ എല്ലാ ദിവസവും ദീപാവലിയാണ്’ -എന്നായിരുന്നു ആർ.ജി.വി എന്ന ചുരുക്കപ്പേരിൽ അറിയപ്പെടുന്ന രാംഗോപാൽ വർമയുടെ ട്വീറ്റ്. ഇന്നലെ (ഒക്ടോ. 20) രാജ്യത്ത് ദീപാവലി ആഘോഷിക്കുമ്പോഴായിരുന്നു ഇദ്ദേഹത്തിന്റെ കുറിപ്പ്.

ഗസ്സയിലെ സാഹചര്യവുമായി ദീപാവലിയെ താരതമ്യം ചെയ്തത് ഒട്ടും യുക്തിപരമായില്ലെന്ന് നെറ്റിസൺസ് വിമർശിച്ചു. ഈ അഭിപ്രായം ക്രൂരവും കൊല്ലപ്പെട്ടവ കുഞ്ഞുങ്ങൾ അടക്കമുള്ളവരോടുള്ള അനാദരവുമാണെന്ന് പലരും പറഞ്ഞു. ധാർമ്മിക തകർച്ചയുടെ അടയാളമാണിതെന്ന് മാധ്യമപ്രവർത്തക റാണ അയ്യൂബ് വിശേഷിപ്പിച്ചു, ‘ദീപാവലി വെളിച്ചത്തെയും പ്രതീക്ഷയെയും കുറിച്ചുള്ളതാണ്. ഗസ്സയാകട്ടെ, വേദനയെയും അതിജീവനത്തെയും കുറിച്ചുള്ളതാണ്’ -ആക്ടിവിസ്റ്റ് രാഖി ത്രിപാഠി പറഞ്ഞു. വർമ്മയിൽ നിന്ന് ഇത്തരമൊരു അഭിപ്രായം ഒരിക്കലും പ്രതീക്ഷിച്ചിരുന്നില്ലെന്നായിരുന്നു എഴുത്തുകാരനായ അശോക് കുമാർ പാണ്ഡെയുടെ മറുപടി.

ഫാഷിസ്റ്റ് വിരുദ്ധ സമീപനം സ്വീകരിക്കുന്ന ആർ‌.ജി.‌വിയുടെ ഈ പോസ്റ്റ് ശ്രദ്ധ ആകർഷിക്കാൻ വേണ്ടി മാത്രമാണെന്ന് ആരാധകരും സിനിമാപ്രേമികളും ചൂണ്ടിക്കാട്ടി. എന്നാൽ, പോസ്റ്റ് പിൻവലിക്കാനോ വിശദീകരണം നൽകുവാനോ അദ്ദേഹം തയാറായിട്ടില്ല. ക്ഷമാപണം നടത്തുകയും ചെയ്തിട്ടില്ല.