ഡൽഹിയിലെ പ്രമുഖ ഗൈനക്കോളജിസ്റ്റ്​ കോവിഡ്​ ബാധിച്ച്​ മരിച്ചു

ന്യൂഡൽഹി: ഡൽഹിയിലെ സർ ഗംഗാറാം ആശ​ുപത്രിയിലെ ഡോക്​ടറും പ്രമുഖ ഗൈ​നക്കോളജിസ്​റ്റുമായ എസ്​.കെ. ബണ്ഡാരി കോവിഡ്​ ബാധിച്ച്​ മരിച്ചു. 86 വയസായിരുന്നു. കോവിഡ്​ ബാധിതയായി ചികിത്സയിലായിരുന്ന അവർ വ്യാഴാഴ്ചയാണ്​ മരണത്തിന്​ കീഴടങ്ങിയത്​.

കോൺഗ്രസ്​ നേതാവ്​ സോണിയ ഗാന്ധി മക്കളായ പ്രിയങ്ക ഗാന്ധി, രാഹുൽ ഗാന്ധി എന്നിവരെ പ്രസവിച്ചപ്പോഴും പ്രിയങ്ക രണ്ടുമക്കളെ പ്രസവിച്ചപ്പോഴും ചികിത്സ നൽകിയത്​ ഇവരായിരുന്നു.

ഹൃദയ സംബന്ധമായ ചികിത്സക്ക്​ രണ്ടാഴ്ച മുമ്പാണ്​ ബണ്ഡാരിയെ ആശുപത്രിയിൽ പ്രവേശിപ്പിച്ചത്​. തുടർന്ന്​ നടത്തിയ പരിശോധനയിൽ കോവിഡ്​ സ്​ഥിരീകരിക്കുകയായിരുന്നു. കോവിഡ്​ ബാധയെ തുടർന്ന്​ ആരോഗ്യനില വഷളായതോടെ വ്യാഴാഴ്ച ഉച്ച മണിയോടെ മരിച്ചതായി ഗംഗാറാം ആശുപത്രി ചെയർമാൻ ഡോ. ഡി.എസ്​. റാണ പറഞ്ഞു.

കോവിഡ്​ പ്രതിരോധ വാക്​സിന്‍റെ രണ്ടു ഡോസും ബണ്ഡാരി സ്വീകരിച്ചിരുന്നു. കോവിഡ്​ ബാധിച്ച​തിനെ തുടർന്ന്​ വിരമിച്ച ഐ.എ.എസ്​ ഓഫിസറായ ഇവരുടെ ഭർത്താവ് ഐ.സി.യുവിൽ ചികിത്സയിൽ തുടരുകയാണ്​. 97 വയസായ അദ്ദേഹത്തെ ഭാര്യയുടെ മരണവിവരം അറിയിച്ചിട്ടില്ല.

ഡോക്​ടറുടെ മരണത്തിൽ കോൺഗ്രസ്​ നേതാവ് പ്രിയങ്ക ഗാന്ധി​ ദുഃഖം രേഖപ്പെടുത്തി. ലണ്ടനിൽനിന്ന്​ ​ബിരുദാനന്തര ബിരുദം കരസ്​ഥമാക്കിയശേഷം ഡൽഹിയിലെ ആശുപത്രിയിൽ ജോലിയിൽ പ്രവേശിക്കുകയായിരുന്നു അവർ. തുടർന്ന്​ 58 വർഷം ഗംഗാറാം ആശുപത്രിയിൽ ബണ്ഡാരി സേവനം അനുഷ്​ഠിച്ചു.