പീഡനത്തിനിരയായ പെൺകുട്ടിക്ക്​ കോവിഡ്​; പ്രതിയും ഉദ്യോഗസ്ഥരും തിഹാർ ജയിലിൽ നിരീക്ഷണത്തിൽ

ന്യൂഡല്‍ഹി: പീഡനത്തിനിരയായ പെൺകുട്ടിക്ക്​ കോവിഡ് 19 സ്ഥിരീകരിച്ചതിനെ തുടർന്ന് തിഹാർ ജയിൽ അധികൃതർ ആശങ്കയിൽ. സംഭവത്തിന്​ പിന്നാലെ​ കേസിലെ പ്രതിയെയും ജയിൽ ഉദ്യോഗസ്ഥരെയും ക്വാറൻറീനിൽ പ്രവേശിപ്പിച്ചിരിക്കുകയാണ്​. പ്രതിയെ ദിവസങ്ങൾക്ക്​ മുമ്പാണ്​ തിഹാർ ജയിലിൽ എത്തിച്ചത്​. കഴിഞ്ഞ ദിവസമായിരുന്നു പീഡനത്തിനിരയായ​ പെൺകുട്ടിക്ക്​ കോവിഡ്​ സ്ഥിരീകരിച്ചത്​. 

പ്രതിയെ ജയിൽ അധികൃതർ കോവിഡ്​ പരിശോധനക്ക്​ വിധേയനാക്കിയിട്ടുണ്ടെങ്കിലും പരിശോധന ഫലം പുറത്തുവന്നിട്ടില്ല. രണ്ടാം ജയിലിലെ ​െഎസൊലേഷൻ വാർഡിലാണ്​ നിലവിൽ പ്രതിയുള്ളത്​. ഫലം പോസിറ്റീവ്​ ആവുകയാണെങ്കിൽ ഇയാൾക്കൊപ്പം സെല്ലിൽ പാർപ്പിച്ചിരിക്കുന്ന മറ്റുള്ളവർക്കും രോഗം വരാൻ സാധ്യതയുണ്ടെന്ന നിഗമനത്തിലാണ്​ അധികൃതർ.

പ്രതിയുമായി ഇടപഴകിയ അഞ്ച്​ പേരോട്​ എത്രയും പെട്ടന്ന്​ പരിശോധനക്ക്​ വിധേയരാകാൻ നിർദേശിച്ചതായി ജയിൽ അധികൃതർ അറിയിച്ചിട്ടുണ്ട്​. കേസുമായി ബന്ധപ്പെട്ട്​ അന്വേഷണത്തിൽ ഏർപ്പെട്ട പൊലീസുകാരോടും ​െഎസൊലേഷനിൽ കഴിയാൻ നിർദേശിച്ചിട്ടുണ്ട്​.

കോവിഡ്​ സാധ്യതുള്ളവരെ പാർപ്പിക്കാൻ നിലവിൽ തിഹാർ ജയിലിൽ ​െഎസൊലേഷൻ വാർഡുകൾ സ്ഥാപിച്ചിട്ടുണ്ട്​. കുടുംബാംഗങ്ങൾക്ക്​ പ്രതികളെ കാണുന്നതിനും പ്രത്യേക സംവിധാനങ്ങൾ ഒരുക്കിയിട്ടുണ്ട്​. നിരവധി കുപ്രസിദ്ധ കുറ്റവാളികളെ പാർപ്പിച്ചിരിക്കുന്ന ജയിലിൽ മറ്റ്​ തടവുകാർ ഒന്നും പ്രതിയുമായി സമ്പർക്കത്തിൽ ഏർപ്പെട്ടിട്ടില്ലെന്നാണ്​ റിപ്പോർട്ട്​.