ഹരിയാന സർക്കാറിന്‍റെ പിടികിട്ടാപുള്ളികളുടെ പട്ടികയിൽ ഹണിപ്രീതും 

ചണ്ഡിഗഡ്: ബലാത്സംഗക്കേസിൽ ശിക്ഷിക്കപ്പെട്ട ദേരാ സച്ച സൗധ തലവൻ ഗുർമീത് റാം റഹിം സിങ്ങി​​​െൻറ വളർത്തുമകൾ ഹണിപ്രീത് ഇന്‍സാന്‍ ഹരിയാന പോലീസ് തേടുന്ന കൊടും കുറ്റവാളികളില്‍ ഒരാള്‍. പോലീസ് തേടുന്ന 43 പിടികിട്ടാപുള്ളികളടങ്ങുന്ന പട്ടികയിലാണ് ഹണിപ്രീതിന്‍റെ പേരുള്ളത്. ദേരാ വക്താവ് ആദിത്യയും ഈ പട്ടികയിലുണ്ട്. 

ഗുർമീതിനെ കോടതിയിൽനിന്നു ബലം പ്രയോഗിച്ചു മോചിപ്പിക്കാൻ ഗൂഢാലോചന നടത്തിയ കുറ്റത്തിന്​ ഹണിപ്രീതിനും ദേരാ വക്താവ് ആദിത്യക്കുമെതിരെ  പൊലീസ് ലുക്ക്​ ഒൗട്ട്​ നോട്ടിസ് പുറപ്പെടുവിച്ചിരുന്നു. ഹണിപ്രീത് നേപ്പാളിലേക്ക്​ കടന്നതായാണ് സൂചന. നേരത്തെ ഇന്ത്യ– നേപ്പാൾ  അതിർത്തിയിൽനിന്നും പഞ്ചാബ് റജിസ്ട്രേഷനിലുള്ള വാഹനം പിടികൂടിയിരുന്നു. ഇത്​ ഹണിപ്രീതിനെ രക്ഷപ്പെടുത്താൻ ഉപയോഗിച്ച വാഹനമാണെന്ന പേരിൽ അന്വേഷണവും നടത്തിയിരുന്നു. 

നേപ്പാൾ അതിർത്തിയിലുള്ള പോലീസ് സ്‌റ്റേഷനുകളിൽ അടക്കം ഹണിപ്രീതിന്‍റെ ചിത്രം ഉൾപ്പെട്ട പോസ്റ്ററുകൾ പതിക്കുകയും എല്ലാ സ്‌റ്റേഷനുകൾക്കും ജാഗ്രതാ നിർദ്ദേശം നൽകുകയും ചെയ്​തിട്ടുണ്ട്.