കർഷക പ്രക്ഷോഭത്തിൽ സജീവമാണ്​ ഈ 'മല്ലു സിങ്​'- രാജ്​വീന്ദർ സിങ് ഗോൾഡനെ അറിയാം

മലയാളം സംസാരിക്കുന്ന പഞ്ചാബികളെ 'പഞ്ചാബി ഹൗസ്​', 'മല്ലു സിങ്​' തുടങ്ങിയ സിനിമകളിൽ നമ്മൾ കണ്ടിട്ടുണ്ട്​. കേന്ദ്ര സർക്കാറിന്‍റെ കാർഷിക നിയമങ്ങൾക്കെതിരായി ഡൽഹിയിൽ നടക്കുന്ന കർഷക പ്രക്ഷോഭത്തിലും സജീവമായി പ​ങ്കെടുക്കുന്നുണ്ട്​ ഒര 'മല്ലുസിങ്​'. മലയാളവും തമിഴും നന്നായി സംസാരിക്കാൻ അറിയുന്ന രാജ്​വീന്ദർ സിങ്​ ഗോൾഡൻ.

രണ്ട്​ മാസമായി സമരരംഗത്തുണ്ട്​ രാജ്​വീന്ദർ സിങ്​. കേരള അതിർത്തിയിലെ വാളയാറിൽ നിന്ന്​ 12 കിലോമീറ്റർ മാത്രം അകലെയുള്ള മധുക്കരെയിലാണ്​ രാജ്​വീന്ദർ സിങ്​ ജനിച്ചതും വളർന്നതും. കോയമ്പത്തൂരിനടുത്ത്​ പിതാവ്​ ട്രാൻസ്​പോർട്ട്​ ബിസിനസ്​ നടത്തുകയായിരുന്നു അന്ന്​. അവിടെയായിരുന്നു രാജ്​വീന്ദറ​ിന്‍റെ പഠനവും മറ്റും. അങ്ങിനെയാണ്​ മലയാളവും തമിഴും വഴങ്ങിയത്​. പിതാവിന്‍റെ കമ്പനിയിലെ ഡ്രൈവർമാരോടും സഹപാഠികളോടും​ സംസാരിച്ച്​ രണ്ട്​ ഭാഷകളും മിനുക്കിയെടുത്തെന്നും രാജ്​വീന്ദർ പറയുന്നു.

കൊ​വൈപുതൂരിലെ വി.എൽ.ബി ജാനകിയമ്മാൾ കോളജ്​ ഓഫ്​ ആർട്​സ്​ ആൻഡ്​ സയൻസിലായിരുന്നു രാജ്​വീന്ദറിന്‍റെ കോളജ്​ പഠനം. സൈക്കോളജിയിലാണ്​ അദ്ദേഹം ബിരുദമെടുത്തത്​. പിന്നീട്​ ബിസിനസ്​ അമൃത്​സറിലേക്ക്​ മാറ്റിയപ്പോൾ എല്ലാവരും പഞ്ചാബിലേക്ക്​ തിരികെ പോന്നു. ബൽദേവ്​ സിങ്​ സിർസ ലോക്​ ഭലായ്​ ഇൻസാഫ്​ വെൽഫെയർ സൊ​ൈസറ്റിയുടെ സജീവ പ്രവർത്തകൻ കൂടിയാണ്​ രാജ്​വീന്ദർ.

നവംബർ 25 മുതൽ ഡൽഹിയിൽ സമരരംഗത്തുണ്ട്​ അദ്ദേഹം. അതിന്​ മുമ്പ്​ രണ്ടുമാസം അമൃത്​സറിൽ റിലയൻസിന്‍റെ ആൽഫ വൺ മാൾ (മാൾ ഓഫ്​ അമൃത്​സർ) മുന്നിൽ നടന്ന സമരത്തിലും സജീവമായിരുന്നു. മാളിന്‍റെ പ്രവേശനകവാടത്തിൽ കർഷകർ നടത്തിയ പ്രക്ഷോഭം മാളിന്‍റെ അടച്ചിടലിൽ വരെ കലാശിച്ചിരുന്നുവെന്ന രാജ്​വീന്ദർ പറയുന്നു.

ഡൽഹിയിൽ മാധ്യമ പ്രവർത്തകയായ ആഷ്​ലിൻ മാത്യുവാണ്​ ഫേസ്​ബുക്കിലൂടെ രാജ്​വീന്ദർ സിങിനെ പരിചയപ്പെടുത്തിയത്​. ആഷ്​ലിന്‍റെ പോസ്റ്റും രാജ്​വീന്ദർ സിങിന്‍റെ മലയാളം സംസാരവും കാണാം-