രണ്ടു ദിവസത്തെ സന്ദർശനത്തിനായി രാജ്​നാഥ്​സിങ്​ ശ്രീനഗറിലെത്തി

ശ്രീനഗർ: കേന്ദ്ര ആഭ്യന്തര മന്ത്രി രാജ്​നാഥ്​സിങ്​ ശ്രീനഗറിലെത്തി. സുരക്ഷ ക്രമീകരണങ്ങൾ പരിശോധിക്കുന്നതിനായി സർക്കാർ ഉന്നതതല സംഘത്തോടൊപ്പമാണ് ദ്വിദിന സന്ദർശനത്തിനായി​ മന്ത്രി എത്തിയത്​. കേന്ദ്ര ആഭ്യന്തര സെക്രട്ടറി രാജീവ്​ ഗൗബ, ജമ്മു കശ്​മീർ ആഭ്യന്തര ജോ.സെക്രട്ടറി ഗ്യാനേഷ്​ കുമാർ, കേന്ദ്ര മന്ത്രി ജിതേന്ദ്ര സിങ്​ എന്നിവർ അദ്ദേഹത്തെ അനുഗമിച്ചു.

വെടിനിർത്തൽ ലംഘനം, അതിർത്തിക്കിപ്പുറത്തേക്കുള്ള വെടിവെപ്പ്​, ഭീകരവാദികളുടെ നുഴഞ്ഞു കയറ്റം, സുരക്ഷാസേനക്കെതിരെയുള്ള ആക്രമണം, കല്ലേറ്​ തുടങ്ങി വിവിധ പ്രശ്​നങ്ങൾക്കിടയിലാണ്​ ആഭ്യന്തരമന്ത്രിയുടെ സന്ദർശനം. കല്ലേറിനെ തുടർന്ന്​ റോഡിനു പുറത്തേക്ക്​ ​വാഹനം തെന്നി വീണ്​ 19 സി.ആർ.പി.എഫ്​ സേനാംഗങ്ങൾക്ക്​ കഴിഞ്ഞ മാസം പരിക്കേറ്റിരുന്നു.