രാജ്​കോട്ടിൽ കോവിഡ്​ മാനദണ്ഡ​പ്രകാരം സംസ്​കരിച്ചത്​ 1247 മൃതദേഹങ്ങൾ; ഔദ്യോഗിക കണക്കിൽ 94 മരണം

അഹമ്മദാബാദ്​​: ഗുജറാത്തിലെ രാജ്​കോട്ടി​ലുണ്ടായ കോവിഡ്​ മരണങ്ങളെ കുറിച്ച്​ ചോദിച്ചാൽ മുനിസിപ്പൽ കോർപറേഷൻ നൽകുന്ന ഉത്തരം 94 എന്നാകും. മുഖ്യമന്ത്രി വിജയ്​ ​രൂപാനിയോടാണ്​ ഇതേ ചോദ്യം ചോദിച്ചതെങ്കിൽ 131 കോവിഡ്​ മരണമെന്നാകും മറുപടി. എന്നാൽ സെപ്​റ്റംബർ 25 വരെ നഗരത്തിലെ വിവിധ ശ്​മശാനങ്ങളിലായി കോവിഡ്​ ​മാനദണ്ഡങ്ങൾ പാലിച്ച്​ സംസ്​കരിച്ചത്​ ആയിരത്തിലേറെ മൃതദേഹങ്ങളാണെന്നാണ്​ റിപ്പോർട്ട്​.

രാജ്​കോട്ടിലെ നാലു ​ൈവദ്യുത ശ്​മശാനങ്ങളിലെയും ആറ്​ സെമിത്തേരികളിലെയും രേഖകൾ പരിശോധിച്ചതിൽ നിന്നും 1247 മൃതദേഹങ്ങൾ കോവിഡ്​ മാനദണ്ഡപ്രകാരം സംസ്​കരിച്ചിട്ടുണ്ട്​. കോവിഡ്​ ബാധിച്ച്​ മരിച്ചവരിൽ കൂടുതൽ പേരെയും വൈദ്യുത ശ്​മശാനത്തിലാണ്​ ദഹിപ്പിച്ചത്​​.

ആഗസ്​റ്റിൽ 1736 മരണങ്ങളും സെപ്​റ്റംബറിൽ 2087 മരണങ്ങളും ഉണ്ടായിട്ടുണ്ടെന്ന്​ കോർപറേഷൻ ജീവനക്കാരൻ പറയുന്നു. എന്നാൽ മരണകാരണം വ്യക്തമാക്കാൻ ഇവർ തയാറല്ല. കഴിഞ്ഞ വർഷത്തേക്കാൾ ഇരട്ടി മരണങ്ങൾ ഉണ്ടായെന്നാണ്​ ഇവർ പറയുന്നത്​. എന്നാൽ രാജ്​കോട്ട്​ മുനിസിപ്പൽ കമീഷണർ ഉദിത്​ അഗർവാൾ ഇക്കാര്യം നിഷേധിച്ചു.

നഗരത്തിലെ ഏറ്റവും വലിയ ശ്​മശാനമായ രാമനാഥപരാ മുക്തി ധാമിൽ 2019 ൽ ആകെ 1876 മൃതദേഹങ്ങളാണ്​ സംസ്​കരിച്ചത്​. എന്നാൽ 2020 സെപ്​റ്റംബർ 21 വരെയുള്ള കണക്ക്​ പ്രകാരം 3000ത്തോളം മൃതദേഹങ്ങൾ ദഹിപ്പിച്ചു. കോവിഡുമായി ബന്ധപ്പെട്ട്​ മൂന്നുമാസത്തിനിടെ സർക്കാർ മാനദണ്ഡപ്രകാരം 659 മൃതദേഹങ്ങൾ ഇവിടെ സംസ്​കരിച്ചിട്ടുണ്ട്​. കോവിഡുമായി ബന്ധപ്പെട്ട്​ ജൂലൈയിൽ 102 ഉം ആഗസ്​റ്റിൽ 334 ഉം സെപ്​റ്റംബറിൽ 223 ഉം മൃതദേഹങ്ങൾ സംസ്​കരിച്ചുവെന്നാണ്​ ശ്​മശാന അധികൃതർ വ്യക്തമാക്കുന്നത്​.

രാജ്​കോട്ടിലെ മോട്ട മാവ ശ്​മശാനത്തിലെ ജീവനക്കാർക്കും മരണനിരക്ക്​ ഇരട്ടിയായതിനെകുറിച്ച്​ തന്നെയാണ്​ പറയാനുള്ളത്​. നഗരത്തിനോട്​ ചേർന്നുകിടക്കുന്ന ജാംനഗർ, മോർബി, പോർബന്തർ, ജുനഗഡ്,​ ​ഗൊണ്ടാൽ തുടങ്ങിയ ഗ്രാമങ്ങളിൽ നിന്നും മൃതദേഹം സംസ്​കരിക്കാൻ മോട്ട മാവ ശ്​മശാനത്തിലേക്കാണ്​ മൃതദേഹങ്ങൾ എത്തിക്കാറുള്ളത്​. ജൂൺ മുതൽ സെപ്​റ്റംബർ വരെ കോവിഡ​ുമായി ബന്ധപ്പെട്ട്​ 228 മൃതദേഹങ്ങൾ സംസ്​കരിച്ചുവെന്ന്​ ജീവനക്കാർ പറയുന്നു.

നഗരത്തിലെ മഹുദി ശ്​മശാനത്തിൽ സെപ്​തംബർ 15 വരെ 65 മൃതദേഹങ്ങളും സൊറാതിയ വാദി ശ്​മശാനത്തിൽ 283 മൃതദേഹങ്ങളും കോവിഡ്​ മാനദണ്ഡപ്രകാരം ദഹിപ്പിച്ചുവെന്നാണ്​ റിപ്പോർട്ട്​.