രാജീവ്​ ഗാന്ധി ഫൗണ്ടേഷൻ ചൈനയിൽ നിന്നും പണം സ്വീകരിച്ചു -​സ്​മൃതി ഇറാനി

മുംബൈ: സോണിയാ ഗാന്ധിയുടെ നേതൃത്വത്തിലുള്ള രാജീവ്​ ഗാന്ധി ഫൗണ്ടേഷൻ ചൈനയിൽ നിന്നും പണം സ്വീകരിച്ചെന്ന ആരോപണവുമായി കേന്ദ്രമന്ത്രി സ്​മൃതി ഇറാനി. രാജീവ് ഗാന്ധി ഫൗണ്ടേഷനുവേണ്ടി സോണിയ ഗാന്ധി പണം വാങ്ങിയതിന് തെളിവുകളുണ്ടെന്നും അവർ വ്യക്​തമാക്കി. തീരദേശ മഹാരാഷ്​ട്രയിലെ ബി.ജെ.പി പ്രവർത്തകർക്കായി സംഘടിപ്പിച്ച വെർച്വൽ റാലിയിൽ സംസാരിക്കുകയായിരുന്നു അവർ.

രാജീവ്​ ഗാന്ധി ഫൗണ്ടേഷനിലേക്ക്​ വന്ന ഫണ്ട്​ സോണിയാ ഗാന്ധി എടുത്തിട്ടുണ്ട്​. അവരുടെ കുടുംബത്തെ ആ പണം സഹായിച്ചിട്ടുമുണ്ട്​. അന്നത്തെ പ്രധാനമന്ത്രി മൻമോഹൻ സിംഗ്, ഫൗണ്ടേഷന് 100 കോടി രൂപ ലഭിച്ചുവെന്ന് ഉറപ്പു വരുത്തിയതായും സ്മൃതി ഇറാനി ചൂണ്ടിക്കാട്ടി. ചൈനീസ് എംബസിയിൽ നിന്ന് കോൺഗ്രസ് സംഭാവന സ്വീകരിച്ചത് എന്തിനാണെന്ന് ഗാന്ധി കുടുംബം വ്യക്തമാക്കണം. -സ്​മൃതി ഇറാനി കൂട്ടിച്ചേർത്തു.

പിഎം കെയേർസിൽ ചൈനീസ് കമ്പനികൾ കോടികൾ സംഭാവനയായി നല്കിയിട്ടുണ്ടെന്ന കോൺഗ്രസി​െൻറ ആരോപണങ്ങൾക്ക്​ മറുപടി പറയുകയായിരുന്നു കേന്ദ്രമന്ത്രി. ചൈനീസ്​ ബഹിഷ്​കരണമെന്ന പ്രചാരണം ശക്​തമാവു​േമ്പാൾ​ ഷവോമി, ​ഒപ്പോ, വാവേയ്, ടിക്​ ടോക്​​ തുടങ്ങിയ കമ്പനികൾ കോവിഡ്​ പ്രതിരോധത്തിനായുള്ള പി.എം കെയ്​ഴ്​സ്​ ഫണ്ടിലേക്ക്​ സംഭാവന നൽകിയെന്നായിരുന്നു​ കോൺഗ്രസ്​ നേതാവ്​ മനു അഭിഷേക്​ സിങ്​വി ആരോപിച്ചത്​​. മെയ്​ 20 വരെ 9,678 കോടിയാണ്​ പി.എം കെയ്​ഴ്​സ്​ ഫണ്ടിലേക്ക്​ സംഭാവനയായി ലഭിച്ചത്​.

പി.എം കെയ്​ഴേ്​സ്​ ഫണ്ടിലേക്ക്​ വാവേയ്​ ഏഴ്​ കോടിയും ടിക്​ ടോക്​ 30 കോടിയും നൽകിയിട്ടുണ്ട്​. 38 ശതമാനം ചൈനീസ്​ നിക്ഷേപമുള്ള പേടിഎം 100 കോടി രൂപയാണ്​ സംഭാവനയായി​ നൽകിയത്​. ഷവോമി 15 കോടിയും ഒപ്പോ ഒരു കോടിയും ഫണ്ടിലേക്ക്​ നൽകിയിട്ടുണ്ടെന്ന്​ കോൺഗ്രസ്​ പുറത്തിറക്കിയ പ്രസ്​താവനയിൽ വെളിപ്പെടുത്തുന്നു. സംഭാവന നൽകിയ കാര്യം ഷവോമി സ്ഥിരീകരിച്ചിട്ടുണ്ട്​.