ഇൻസ്റ്റഗ്രാം ലൈവിൽ കൗമാരക്കാരന്റെ ആത്മഹത്യ; മകന്റെ ദുരന്തവാർത്തയറിഞ്ഞ് പിതാവും തൂങ്ങിമരിച്ചു

ഉദയ്പൂർ: ഇൻസ്റ്റഗ്രാമിൽ ലൈവ് ടെലികാസ്റ്റ് ചെയ്ത് കൗമാരക്കാരന്റെ ആത്മഹത്യ. വിഷം കഴിച്ച് ആത്മഹത്യ ചെയ്യുന്ന ദൃശ്യങ്ങളാണ് കൗമാരക്കാരൻ ഇൻസ്റ്റഗ്രാം റീൽസിലൂടെ പങ്കുവെച്ചത്. ഉദയ്പൂർ സ്വദേശിയായ ദേവിസിങ്ങാണ് ആത്മഹത്യ ചെയ്തത്. മകന്റെ മരണത്തിന് പിന്നാലെ പിതാവും ആത്മഹത്യ ചെയ്തു. മകന്റെ മരണാനന്തര ചടങ്ങുകൾക്ക് പിന്നാലെയായിരുന്നു പിതാവിന്റെ ആത്മഹത്യ.

സൾഫാസ് ടാബ്ലെറ്റുകൾ കഴിച്ച് ആത്മഹത്യ ചെയ്യുന്ന ദൃശ്യങ്ങളാണ് കൗമാരക്കാരൻ ഇൻസ്റ്റഗ്രാം റീലിലൂടെ പങ്കുവെച്ചത്. തുടർന്ന് വിഡിയോ കണ്ട സഹോദരൻ നാട്ടുകാരെ വിവരമറിയിക്കുകയായിരുന്നു. നാട്ടുകാരെത്തി ഇയാളെ ആശുപത്രിയിൽ എ​ത്തിച്ചെങ്കിലും ജീവൻ രക്ഷിക്കാനായില്ല. ദേവിസിങ്ങിന്റെ അപ്രതീക്ഷിത വിയോഗം വീട്ടുകാർക്ക് ഉൾക്കൊള്ളാനായില്ല. മരണവാർത്ത കേട്ട പിതാവും അതീവ ദുഃഖത്തിലായിരുന്നു.

തുടർന്ന് മകന്റെ മരണാനന്തര ചടങ്ങുകൾക്ക് ശേഷം വീട്ടിലെത്തിയ പിതാവ് തൂങ്ങിമരിക്കുകയായിരുന്നു. സൂറത്തിൽ ജോലി ചെയ്യുകയായിരുന്ന ദേവിസിങ് ജൂലൈ 11ന് രാത്രിയാണ് ആത്മഹത്യ ചെയ്തതെന്ന് പൊലീസ് അറിയിച്ചു. ബോധംപോയ നിലയിലായിരുന്നു ഇയാളെ ആശുപത്രിയിൽ പ്രവേശിപ്പിച്ചതെന്നും പൊലീസ് വ്യക്തമാക്കി.