രാജസ്ഥാനിൽ ക്ഷേത്രഭൂമി തർക്കം: പുരോഹിതനെ തീകൊളുത്തി കൊന്നു

ജയ്​പൂർ: രാജസ്ഥാനിലെ കരൗലി ജില്ലയിൽ ക്ഷേത്രഭൂമി പിടിച്ചെടുക്കാനായി പുരോഹിതനെ ഭൂമാഫിയ സംഘം തീകൊളുത്തി കൊന്നു. സപൊത്ര ഡിവിഷനിലെ ബോക്ന ഗ്രാമത്തിലാണ് സംഭവം. രാധാകൃഷ്​ണ ക്ഷേത്രത്തിലെ പുരോഹിതനായ ബാബുലാൽ വൈഷ്ണവ് എന്ന 50കാരനാണ്​ പൊള്ളലേറ്റ്​ മരിച്ചത്​.

രാധാകൃഷ്ണ ക്ഷേത്ര ട്രസ്റ്റി​െൻറ ഉടമസ്ഥതയിലുള്ള 5.2 ഏക്കർ സ്ഥലത്തി​െൻറ പേരിലുള്ള തർക്കമാണ്​ കൊലയിൽ കലാശിച്ചത്​. ഈ സ്ഥലം പുരോഹിതന് വരുമാന മാർഗമായി നൽകിയതായിരുന്നു. ക്ഷേത്ര ട്രസ്റ്റുകളിൽ ഉൾപ്പെടുന്ന ഇതുപോലുള്ള സ്ഥലങ്ങൾ പൂജകൾ നടത്തുകയും ഗ്രാമക്ഷേത്രങ്ങളിലെ അനുഷ്ഠാനങ്ങൾ നടത്തുകയും ചെയ്യുന്നതിന് പകരമായി പുരോഹിതന്മാർക്ക് വരുമാന മാർഗമായി ഉപയോഗത്തിനായി നൽകാറുണ്ട്.

എന്നാൽ ഈ ഭൂമിയോടെ ചേർന്ന്​ കിടക്കുന്ന ത​െൻറ പേരിലുള്ള സ്ഥലത്ത്​ ബാബു ലാൽ വൈഷ്ണവ് ഒരു വീട് നിർമിക്കാൻ തുടങ്ങിയതോടെയാണ്​ പ്രശ്​നം ആരംഭിച്ചത്​. തട്ടായി കിടന്ന ഭൂമി നിരപ്പാക്കിയതോടെ ഗ്രാമത്തിലെ പ്രബലരായ മീണ സമുദായത്തിൽ നിന്നുള്ള മറ്റൊരു വിഭാഗം ആളുകൾ ഇതിനെ എതിർക്കുകയും ഭൂമി അവരുടെ പാരമ്പര്യസ്വത്താണെന്ന്​ അവകാശപ്പെട്ട്​ രംഗത്തെത്തുകയുമായിരുന്നു.

​തർക്കത്തിലെ ​ഗ്രാമപ്രമുഖർ ഇടപെട്ട്​ പുരോഹിതന്​ അനുകൂലമായി വിധി പറഞ്ഞതോടെ, അവിടെ വിളവെടുത്ത ബജ്​റ ധാന്യത്തി​െൻറ​ വൈക്കോൽ കെട്ടുകൾ ഉടമസ്ഥാവകാശത്തി​െൻറ അടയാളമായി അതിർത്തിയിൽ ത​ന്നെ വെച്ചു.

എന്നാൽ പുരോഹിതൻ നിരപ്പാക്കിയ സ്ഥലത്ത് പ്രതിഭാഗത്തുള്ളവർ സ്വന്തമായി കുടിൽ പണിയാൻ തുടങ്ങി. ഇത് വാക്കേറ്റത്തിന് കാരണമായി. ബുധനാഴ്​ച പ്രതികൾ തർക്ക സ്ഥലത്ത്​ കിടന്ന ബജ്​റ വൈക്കോൽ കൂനകൾക്ക്​ പെട്രോൾ ഒഴിച്ച് തീയിടുകയും പുരോഹിതനെ പൊള്ളലേൽപ്പിക്കുകയും ചെയ്യുകയായിരുന്നു.

പ്രതികൾ പെട്രോളൊഴിച്ച്​ തീകൊളുത്തുകയായിരുന്നുവെന്നാണ്​ പുരോഹിത​െൻറ മൊഴി. പൊള്ളലേറ്റതിനെ തുടർന്ന് ജയ്പൂരിലെ എസ്.എം.എസ് ആശുപത്രിയിൽ പ്രവേശിപ്പിച്ച ഇയാൾ വ്യാഴാഴ്ച വൈകിട്ട് മരിച്ചു.

സംഭവത്തിൽ കൊലപാതക കേസ് രജിസ്​റ്റർ ചെയ്തതായി മുതിർന്ന പൊലീസ് ഉദ്യോഗസ്ഥൻ ഹർജി ലാൽ യാദവ് പറഞ്ഞു. പുരോഹിത​െൻറ​ മൊഴിയുടെ അടിസ്ഥാനത്തിൽ മുഖ്യപ്രതി കൈലാഷ്​ മീണയെ പൊലീസ്​ കസ്റ്റഡിയിലെടുത്തി.

കൈലാഷ്, ശങ്കർ, നമോ മീണ, മറ്റ് മൂന്ന് പേർ എന്നിവർക്കെതിരെയാണ്​ പുരോഹിതൻ മൊഴി നൽകിയിട്ടുള്ളത്​. മറ്റു പ്രതികളെയും ഉടൻ പിടികൂടുമെന്ന്​ പൊലീസ്​ അറിയിച്ചു.