മോദി അനുകൂല പ്രസ്താവന: ഗവർണർ കല്യാൺ സിങ്​ ചട്ടം ലംഘിച്ചെന്ന് തെരഞ്ഞെടുപ്പ്​ കമീഷൻ

ന്യൂഡൽഹി: രാജസ്ഥാൻ ഗവർണർ കല്യാൺ സിങ്​ തെരഞ്ഞെടുപ്പ്​ പെരുമാറ്റചട്ടം ലംഘിച്ചതായി തെരഞ്ഞെടുപ്പ്​ കമീഷൻ. നരേന്ദ്രമോദിയെ വീണ്ടും തെര​െഞ്ഞടുക്കണമെന്ന ഗവർണറുടെ പ്രസ്​താവന ചട്ടലംഘനാമാണെന്നാണ്​ കമീഷൻ കണ്ടെത്തിയത്​. കല്യാൺസിങിൻെറ പരാമർശം രാഷ്​ട്രപതിയുടെ ശ്രദ്ധയിൽപെടുത്തുമെന്നും തെരഞ്ഞെടുപ്പ്​ കമീഷൻ പറഞ്ഞു.

കഴിഞ്ഞ മാസം 23ന്​ അലിഗഢിൽ വെച്ചായിരുന്നു ചട്ടലംഘനത്തിന്​ കാരണമായ പരാമർശം നടത്തിയത്​. ‘‘നമ്മളെല്ലാവരും ബി.ജെ.പി പ്രവർത്തകരാണ്​, അതിനാൽ ബി.​െജ.പി വിജയിക്കാൻ ആഗ്രഹിക്കുന്നു. എല്ലാവരും മോദി വീണ്ടും പ്രധാനമന്ത്രി ആവണമെന്ന്​ ആഗ്രഹിക്കുന്നു. മോദി പ്രധാനമന്ത്രി ആവേണ്ടത്​ രാജ്യത്തി​നും സമൂഹത്തിനും അത്യാവശ്യമാണ്​.’’ -എന്നായിരുന്നു അദ്ദേഹത്തിൻെറ വാക്കുകൾ.

സിറ്റിങ്​ എം.പിയായ സതീഷ്​ ഗൗതമിനു തന്നെ വീണ്ടും അലിഗഢ്​ സീറ്റ്​ നൽകിയതിനെതിരെ ബി.ജെ.പി പ്രവർത്തകർക്കിടയിൽ ഉയർന്ന പ്രതിഷേധം ശമിപ്പിക്കുന്നതിൻെറ ഭാഗമായായിരുന്നു കല്യാൺസിങിൻെറ പരാമർശം.

ഹിമാചൽ പ്രദേശ്​ ഗവർണറായിരുന്ന ഗുൽഷർ അഹമ്മദ്​ ആയിരുന്നു ഇതിനു മുമ്പ് തെരഞ്ഞെടുപ്പ്​ കമീഷൻ​ ചട്ടലംഘനം നടത്തിയതായി കണ്ടെത്തിയ ഗവർണർ. തൊണ്ണൂറുകളുടെ ആദ്യമായിര​ുന്നു സംഭവം. ഗുൽഷർ അഹമ്മദിൻെറ മകൻ സയീദ്​ അഹമ്മദിൻെറ തെരഞ്ഞെടുപ്പ്​ പ്രചാരണത്തിനെത്തിയതായിരുന്നു അദ്ദേഹത്തിന്​ വിനയായത്​.