പാകിസ്​താന്​ വിവരങ്ങൾ ചോർത്തി: ആർമിയിലെ ഡ്രൈവർ അറസ്​റ്റിൽ

ജയ്​പൂർ: പാകിസ്​താന് വേണ്ടി​ ചാരപ്രവൃത്തി നടത്തിയ കുറ്റത്തിന് രാജസ്ഥാനിലെ നിവാരുവിലെ​ മിലിട്ടറി എൻജിനീയറിങ്​ സർവീസിൽ ജോലിചെയ്യുന്ന ഡ്രൈവറെ അറസ്​റ്റ്​ ചെയ്​തു. 28കാരനായ രാംനിവാസ്​ ഗൗരയാണ്​ അറസ്​റ്റിലായത്​. പാകിസ്​താൻ ഇൻറലിജൻസ്​ ഏജൻസിക്ക്​ വിവരം ചോർത്തിയെന്ന ഗുരുതര കുറ്റമാണ്​​ ഗൗരക്കെതിരെ ചുമത്തിയിരിക്കുന്നത്​​.

''ഗൗര പാകിസ്​താൻ ഇൻറലിജൻസ്​ ഓപ്പറേറ്ററുടെ Ekta @ Jasmeet Kour എന്ന ഫേസ്​ബുക്​ അക്കൗണ്ടിലൂടെയും വാട്​സ്​ആപ്പിലൂടെയും ബന്ധപ്പെട്ടതായി​ കണ്ടെത്തിയിരിക്കുന്നു. രണ്ട്​ വർഷത്തോളമായി തുടരുന്ന ബന്ധത്തിനിടയിൽ നിവാരുവിലെയും ജയ്​പൂരിലെയും യൂനിറ്റുകളുടെ നിരവധി വിവരങ്ങൾ ചോർത്തിക്കൊടുത്തു'' -ആർമി ഉദ്യോഗസ്ഥൻ പ്രതികരിച്ചു.

ആർമി ഉദ്യോഗസ്ഥർ നൽകിയ വിവരത്തെത്തുടർന്ന്​ ഗൗരയെ ചോദ്യം ചെയ്യുകയും ശനിയാഴ്​ച അറസ്​റ്റ്​ ചെയ്യുകയുമായിരുന്നെന്ന്​ എ.ഡി.ജി ഉമേഷ്​ മിശ്ര അറിയിച്ചു. ചോദ്യം ചെയ്യലിൽ ഗൗര കുറ്റം സമ്മതിച്ചുവെന്നാണ്​ സൂചന​.

പാകിസ്​താൻ ഇൻറലിജൻസ്​ ഏജൻസി ഇന്ത്യൻ വാട്​സ്​ആപ് നമ്പറാണ്​ ഉപയോഗിച്ചിരിക്കുന്നത്​. സംഭവത്തെക്കുറിച്ച്​ വിശദ അന്വേഷണം നടത്തും.