രാജസ്​ഥാൻ ഒാർഡിനൻസ്​: കേന്ദ്ര-സംസ്​ഥാന സർക്കാറുകൾക്ക്​ നോട്ടീസ്​

ന്യൂഡൽഹി: രാജസ്​ഥാനി​െല വസുന്ധര രാ​െജ സർക്കാർ കൊണ്ടുവന്ന വിവാദ ഒാർഡിനൻസി​െനതിരായ പരാതിയിൽ രാജസ്​ഥാൻ ഹൈകോടതി കേന്ദ്ര- സംസ്​ഥാന സർക്കാറുകൾക്ക്​ നോട്ടീസ്​​ അയച്ചു. പരാതിയിൽ നവംബർ 27ന്​ വാദം കേൾക്കും. മന്ത്രിമാർക്കും സർക്കാർ ഉദ്യോഗസ്​ഥർക്കുമെതിരായ അഴിമതി ആരോപണങ്ങളിൽ നിയമ നടപടി സ്വീകരിക്കാൻ കോടതി സർക്കാറി​​​െൻറ അനുവാദം വാങ്ങണ​െമന്ന്​ നിഷ്​കർഷിക്കുന്നതാണ്​ ഒാർഡിനൻസ്​.  ആരോപണ വിധേയരുടെ പേരുകൾ പരാമർശിക്കുന്ന മാധ്യമപ്രവർത്തകർക്കെതിരെ രണ്ടു വർഷം തടവ്​ ശിക്ഷ ലഭിക്കുന്ന കുറ്റം ചുമത്താമെന്നും ഒാർഡിനൻസിൽ പറയുന്നു. 

ഒാർഡിനൻസിനെതിരെ പ്രതിപക്ഷത്തുനിന്നും ഭരണപക്ഷത്തുനിന്നും വ്യാപകമായ പരാതികൾ ഉയർന്നിരുന്നു. ചിലർ ഒാർഡിനൻസ്​ റദ്ദാക്കണമെന്നാവശ്യ​െപ്പട്ട്​ കോടതിയേയും സമീപിച്ചിരുന്നു. മാധ്യമപ്രവർത്തകർക്കെതിരായ നടപടിയെ കുറിച്ച്​ രൂക്ഷ വിമർശനമുയർന്ന സാഹചര്യത്തിൽ ആ ഭാഗം പുനഃപരിശോധിക്കുന്നതിനായി നിലവിൽ ഒാർഡിനൻസ്​ സെലക്​ട്​ കമ്മിറ്റിക്ക്​ മുമ്പാകെ സമർപ്പിച്ചിരിക്കുകയാണ്​.