ആൻഡമാനിൽ ട്രെയിൻ സർവീസിന്​ സർക്കാർ അനുമതി

ന്യൂഡൽഹി: ആൻഡമാൻ നിക്കോബാർ ദ്വീപുകളിൽ ട്രെയിനോടിക്കാൻ കേന്ദ്ര സർക്കാർ അനുമതി. ആൻഡമാൻ നിക്കോബാർ ദ്വീപുകളിലെ പോർട്ട്​ബ്ലെയറി​നെയും ദിഗ്ലിപൂരിനെയും ബന്ധിപ്പിച്ചാണ്​ ട്രെയിൻ സർവ്വീസ്​ തുടങ്ങുക. 240 കിലോമീറ്റർ നീളത്തിൽ ബ്രോഡ്​ ഗേജ്​ റെയിൽവേ ലൈനാണ്​ വരുന്നത്​.

പദ്ധതിക്ക്​ റെയിൽവേ മന്ത്രാലയം അനുമതി നൽകി. ആൻഡമാനിലെ തെക്കും വടക്കുമുള്ള രണ്ടു നഗരങ്ങളെ ബന്ധിപ്പിക്കുന്ന തരത്തിലാണ്​ റെയിൽവേ ലൈൻ വരുന്നത്​. നിലവിൽ 14 മണിക്കൂർ ബസിൽ സഞ്ചരിക്കുകയോ 24 മണിക്കൂർ ബോട്ട്​ യാത്ര നടത്തുകയോ ചെയ്​താൽ മാത്രമേ ഒരിടത്തു നിന്ന്​ മറ്റൊരിടത്ത്​ എത്തുകയുള്ളൂ. എന്നാൽ ബ്രോഡ്​ ഗേജ്​ വരുന്നതോ​െട മൂന്നു മണിക്കൂർ കൊണ്ട്​ യാത്ര സാധ്യമാകും.

2,413.68 കോടി രൂപയാണ്​ ചെലവ്​ പ്രതീക്ഷിക്കുന്നത്​. നയതന്ത്ര പ്രാധാന്യവും ടൂറിസം സാധ്യതകളും കണക്കിലെടുത്താണ് ഇത്തരമൊരു പദ്ധതിയ്ക്ക് മന്ത്രാലയം രൂപംനല്‍കിയത്. റെയില്‍ പാത യാഥാര്‍ത്ഥ്യമാകുന്നതോടെ ദ്വീപിലെ വിനോദ സഞ്ചാര മേഖലയില്‍ സന്ദര്‍ശകരുടെ എണ്ണം വർഷത്തിൽ 4.5 ലക്ഷം എന്നത്​ 6 ലക്ഷമായി വർധിക്കുമെന്ന പ്രതീക്ഷയിലാണ്​ അധികൃതർ.

റെയില്‍ മന്ത്രാലയത്തി​​െൻറ ആസൂത്രണ- സാമ്പത്തിക വിഭാഗം കഴിഞ്ഞ ആഴ്ചയാണ് പദ്ധതിക്ക്​ അംഗീകാരം നല്‍കിയത്. പദ്ധതിക്ക്​ ചെലവാകുന്ന തുകയുടെ പകുതി ആന്‍ഡമാന്‍- നിക്കോബാര്‍ സര്‍ക്കാരാണ് വഹിക്കുക.

പാത സംബന്ധിച്ച് റെയില്‍വേ നടത്തിയ സര്‍വ്വേ 2014 ഡിസംബറില്‍ പൂര്‍ത്തീകരിച്ചിരുന്നു. എന്നാല്‍ പിന്നീട് ഇത് മുടങ്ങുകയും 2016ല്‍ വീണ്ടും സര്‍വ്വേ നടത്തി പദ്ധതി പുനരുജ്ജീവിപ്പിക്കുകയുമായിരുന്നു..