പ്രതിപക്ഷത്തിന്‍െറ ചോദ്യങ്ങള്‍ക്ക് ഇപ്പോഴും ഉത്തരമില്ളെന്ന് രാഹുല്‍

ന്യൂഡല്‍ഹി: ഉത്തരാഖണ്ഡിലെ ഭൂചലനത്തെ പരിഹസിക്കുകയും സ്വാതന്ത്ര്യസമരത്തെ അവഹേളിക്കുകയും ചെയ്യുന്ന പ്രധാനമന്ത്രി നരേന്ദ്ര മോദി നോട്ടു അസാധുവാക്കലിനെപ്പറ്റി പ്രതിപക്ഷം ഉന്നയിച്ച ചോദ്യങ്ങള്‍ക്ക് ഉത്തരം പറയാന്‍ തയാറായിട്ടില്ളെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി. മോദിക്കെതിരെ ചില കാര്യങ്ങള്‍ തുറന്നുപറഞ്ഞാല്‍ ഭൂകമ്പമുണ്ടാകുമെന്ന് നേരത്തേ രാഹുല്‍ ആരോപിച്ചതിന്  മറുപടിയായി പാര്‍ലമെന്‍റില്‍ മോദി രാഹുലിനെ പരിഹസിച്ച് സംസാരിച്ചിരുന്നു.

തിങ്കളാഴ്ച ഉത്തരാഖണ്ഡിലുണ്ടായ ഭൂകമ്പത്തെ പരാമര്‍ശിച്ച് ഒടുവില്‍ ആ ‘ഭൂകമ്പം’ സംഭവിച്ചിരിക്കുന്നു എന്നായിരുന്നു പ്രധാനമന്ത്രിയുടെ കളിയാക്കല്‍. ഉത്തരാഖണ്ഡിന്‍െറ ആത്മാഭിമാനത്തെയാണ് പ്രധാനമന്ത്രി നിന്ദിച്ചതെന്നും  പാര്‍ലമെന്‍റില്‍ അപ്പോഴുണ്ടായിരുന്ന എം.പിമാര്‍ ഈ വികാരം പങ്കുവെച്ചവരാണെന്നും രാഹുല്‍ പറഞ്ഞു.