'ബി.ജെ.പിക്ക്​ ഡിസ്​ലൈക്​ നിർത്തലാക്കാൻ കഴിഞ്ഞേക്കാം, പക്ഷേ നിങ്ങൾ ശബ്​ദിക്കുന്നത്​ നിർത്തലാക്കാനാകില്ല'

ന്യൂഡൽഹി: യൂട്യൂബിൽനിന്നും ഡിസ്​ലൈക്​ ഓപ്​ഷൻ ഒഴിവാക്കുന്ന ബി.ജെ.പിക്കെതിരെ പരിഹാസവുമായി കോൺഗ്രസ്​ നേതാവ്​ രാഹുൽഗാന്ധി. 'അവർക്ക്​ ഡിസ്​ലൈക്കുകളും കമൻറുകളും നിർത്തലാക്കാൻ പറ്റിയേക്കാം, പക്ഷേ നിങ്ങൾ ശബ്​ദിക്കുന്നത്​ നിർത്താൻ കഴിയില്ല. നിങ്ങളുടെ ശബ്​ദം ഞങ്ങൾ ലോകത്തിന്​ മുന്നിലെത്തിക്കും' - രാഹുൽ ട്വീറ്റ്​ ചെയ്​തു.

രാജ്യം സ്വയം പര്യാപ്​തത നേടാൻ വീടുകളിൽ ഇന്ത്യൻ പട്ടിയെ വളർത്തണമെന്ന പ്രധാനമന്ത്രി നരേ​ന്ദ്രമോദിയുടെ പ്രസംഗത്തിന്​ 12 ലക്ഷത്തിലേറെ ഡിസ്​ലൈക്​ ലഭിച്ചിരുന്നു. തുടർന്നുള്ള പ്രസംഗങ്ങൾക്കും ഡിസ്​ലൈക്​ വർധിച്ചതിന്​ പിന്നാലെ ഡിസ്​ലൈക്​ ഓപ്​ഷനും നെഗറ്റീവ്​ കമൻറുകളും ഒഴിവാക്കാൻ ബി.ജെ.പി തീരുമാനിക്കുന്നുവെന്ന്​ വാർത്തകൾ പുറത്തുവന്നിരുന്നു. ഈ പശ്ചാത്തലത്തിൽ ആർ.ആർ.ബി പരീക്ഷ ടാഗോടെയാണ്​ രാഹുലിൻെറ പുതിയ ട്വീറ്റ്​.

കോവിഡ്​ ഭീതിത സാഹചര്യത്തിൽ നീറ്റ്​, ജെ.ഇ.ഇ പരീക്ഷകളെഴുതാൻ നിർബന്ധിക്കപ്പെടുന്നതിൽ പ്രതിഷേധിച്ച്​ വിദ്യാർഥികളായിരുന്നു ഡിസ്​ലൈക്കടിക്കുന്നതിൽ മുന്നിലുണ്ടായിരുന്നത്​. എന്നാൽ സംഗതി കൈവിട്ടതോടെ ഡിസ്​ലൈക്​ കാമ്പയിൻ കോൺഗ്രസിൻെറ പണിയാണെന്ന്​ ബി.ജെ.പി ആരോപിച്ചിരുന്നു. ആർ.ആർ.ബി പരീക്ഷ തീയ്യതി പ്രഖ്യാപിച്ചതിനുപിന്നാലെയും സമൂഹമാധ്യമങ്ങളിൽ വലിയ പ്രതിഷേധങ്ങൾ കേന്ദ്ര സർക്കാരിനെതിരെ ഉയരുന്നുണ്ട്​.