'ഇന്ത്യയുടെ നമ്പർ എപ്പോഴെത്തും മോദിജി'; രാജ്യത്ത്​ കോവിഡ്​ വാക്​സിൻ വിതരണം ആരംഭിക്കാത്തതിൽ രാഹുൽ ഗാന്ധി

ന്യൂഡൽഹി: രാജ്യത്തെ കോവിഡ്​ പ്രതിരോധ പ്രവർത്തനങ്ങളെ വിമർശിച്ച്​ കോൺഗ്രസ്​ നേതാവ്​ രാഹുൽ ഗാന്ധി. ഇന്ത്യയിൽ കോവിഡ്​ വാക്​സിൻ വിതരണം എന്നു തുടങ്ങുമെന്ന്​ പ്രധാനമന്ത്രി നരേന്ദ്രമോദിയോട്​ ചോദിച്ചു.

'ലോകത്തിലെ 23 ലക്ഷം പേർ കോവിഡ്​ വാക്​സിൻ സ്വീകരിച്ചു. ചൈന, യു.എസ്​, റഷ്യ തുടങ്ങിയ രാജ്യങ്ങൾ വാക്​സിനേഷൻ ആ​രംഭിച്ചു. ഇ​ന്ത്യയുടെ നമ്പർ എപ്പോൾ എത്തും മോദിജി' -രാഹുൽ ഗാന്ധി ട്വീറ്റ്​ ചെയ്​തു. കോവിഡ്​ വാക്​സിൻ വിതരണത്തിന്‍റെ കണക്കുകൾ ഗ്രാഫിൽ ചിത്രീകരിച്ചത്​ പങ്കുവെച്ചായിരുന്നു രാഹുൽ ഗാന്ധിയുടെ ട്വീറ്റ്​.

രാജ്യത്ത്​ കോവിഡ്​ വാക്​സിൻ വിതരണത്തിന്​ ഇതുവരെ അനുമതി നൽകിയിട്ടില്ല. അടുത്ത ആഴ്​ചയോടെ ഓക്​സ്​ഫഡിന്‍റെ ആസ്​​ട്രസെനക വാക്​സിന്​ അനുമതി നൽകുമെന്നാണ്​ വിവരം.

മുൻഗണന വിഭാഗത്തിൽ ഉൾപ്പെ​ട്ട 30 കോടി ഇന്ത്യക്കാർക്ക്​ ആദ്യഘട്ടത്തിൽ കോവിഡ്​ വാക്​സിൻ നൽകാനാണ്​ തീരുമാനമെന്ന്​ കഴിഞ്ഞദിവസം കേന്ദ്ര ആരോഗ്യ മന്ത്രി ഹർഷ വർധൻ അറിയിച്ചിരുന്നു. ആരോഗ്യ പ്രവർത്തകർ, പൊലീസ്​, സൈന്യം, ശുചീകരണ തൊഴിലാളികൾ, 50 വയസിന്​ മുകളിലുള്ളവർ, 50 വയസിൽ താഴെയുള്ള ഗുരുതര രോഗമുള്ളവർ തുടങ്ങിയവർക്കാകും ആദ്യ ഘട്ടത്തിൽ ഇന്ത്യയിൽ വാക്​സിൻ ലഭ്യമാക്കുക. ജനുവരിയിൽ കോവിഡ്​ വാക്​സിൻ ലഭ്യമാക്കുമെന്നും ആരോഗ്യമന്ത്രി അറിയിച്ചിരുന്നു.