ഇന്ത്യൻ മുസ്​ലിംകളുടെ​ വികാസത്തിന് ഇസ്​ലാമിന്‍റെ അടിസ്ഥാനങ്ങൾ മാത്രം മതി -എസ്​.വൈ ഖുറൈശി

ന്യൂഡൽഹി: ഇസ്​ലാമിന്‍റെ അടിസ്ഥാനങ്ങൾ മാത്രം മതി ഇന്ത്യൻ മുസ്​ലിംകളുടെ​ വികാസത്തിനെന്നും എന്നാൽ ഇസ്​ലാമുമായി മുസ്​ലിംകൾ ഏറ്റുമുട്ടുന്ന സാഹചര്യമാണ്​ നിൽനിൽക്കുന്നത്​ എന്നും മുഖ്യതെരഞ്ഞെടുപ്പ്​ കമീഷണർ ഡോ. എസ്​.വൈ ഖുറൈശി അഭിപ്രായപ്പെട്ടു. അന്തരിച്ച പ്രൊഫ. കെ.എ സിദ്ദീഖ്​ ഹസന്‍റെ സ്മരണക്കായി ഹ്യൂമൻ വെൽഫെയർ ഫൗണ്ടേഷൻ ആവിഷ്​ക്കരിച്ച പദ്ധതികളുടെ പ്രഖ്യാപനവും സ്​കോളർഷിപ്പ്​ വിതരണവും ന്യൂഡൽഹി ഇന്ത്യാ ഇസ്​ലാമിക്​ സെന്‍ററിൽ നിർവഹിച്ച്​ സംസാരിക്കുകയായിരുന്നു ഖുറൈശി.

ഇസ്​ലാമിന്‍റെ ഏറ്റവും നല്ല അടിസ്ഥാനങ്ങൾക്ക്​ എതിരായാണ്​ മുസ്​ലികളുടെ പ്രവർത്തനം. വായിക്കൂ എന്ന ആദ്യ വാക്ക്​ പഠിപ്പിച്ച ഖുർആന്‍റെ അനുയായികൾ വിദ്യാഭ്യാസത്തിൽ ഏറ്റവും പിന്നിലാണ്​. സകാത്ത്​ അഞ്ച്​ അടിസ്ഥാനങ്ങളിലൊന്നാക്കിയതാണ്​ ഇസ്​ലാം. 'സകാത്തി'ലൂടെയും ദാനധർമത്തിലൂടെയും ജീവകാരുണ്യ പ്രവർത്തനത്തിനിറങ്ങാനാണത് ചെയ്തത്​​. എന്നാൽ വടക്കേ ഇന്ത്യയിലെങ്കിലും മുസ്​ലിംകൾ ജീവകാരുണ്യ പ്രവർത്തനത്തിന് ഇറങ്ങുന്നില്ല. ദാനധർമം മാത്രമല്ല, സകാത്തും നൽകാൻ തയാറാകുന്നില്ല. നമസ്കാരവും നോമ്പും പോലെ നിർബന്ധ ബാധ്യതയായ സകാത്തും നടപ്പാക്കിയാൽ ഇന്ത്യൻ മുസ്​ലിംകൾ രക്ഷപ്പെടാൻ​ അത്​ മതി. കേരളത്തിൽ നിന്നും മറ്റു ദക്ഷിണേന്ത്യൻ സംസ്ഥാനങ്ങളിൽ നിന്നും​ സന്നദ്ധപ്രവർത്തകർ ഡൽഹിയിൽ വന്ന്​ സാമൂഹിക പ്രവർത്തനം നടത്തുന്നത്​ പോലെ ഉത്തരേന്ത്യയിലുള്ളവർ മുന്നിട്ടിറങ്ങുന്നില്ല.

അൽശിഫ മൾട്ടി സ്​പെഷ്യാലിറ്റി ആശുപത്രി ഡൽഹിയിൽ സ്ഥാപിക്കാൻ പ്രൊഫ. കെ.എ സിദ്ദീഖ്​ ഹസൻ വരേണ്ടിവന്നു. ഒരു ഡൽഹിക്കാരനും ഇത്തരമൊരു ആശുപത്രി സ്ഥാപിക്കാൻ കഴിഞ്ഞില്ല. വിവിധ മേഖലകളിൽ ഹ്യൂമൻ വെൽഫെയർ ഫൗണ്ടേഷൻ നടത്തുന്ന പ്രവർത്തനങ്ങൾ ഏറെ സന്തോഷിപ്പിച്ചുവെന്ന്​ ഖുറൈശി പറഞ്ഞു. മികച്ച രീതിയിലുള്ള പ്രവർത്തനവും വൈവിധ്യമാർന്ന മേഖലകളിലെ ഇടപെടലുകളും വിദ്യാഭ്യാസ മേഖലക്ക്​ നൽകുന്ന ഊന്നലുമാണ്​ ഏറ്റവും ആകർഷകമായി തോന്നിയത് എന്നും ഖുറൈശി കൂട്ടിച്ചേർത്തു.

വിവിധ മേഖലകളിൽ പ്രവർത്തിക്കുന്ന എൻ.ജി.ഒകൾക്കും വ്യക്​തികൾക്കും യഥാക്രമം അഞ്ച്​ ലക്ഷം രൂപയുടെയും ഒരു ലക്ഷം രൂപയുടെയും പേരിലുള്ള പ്രൊഫ. കെ.എ സിദ്ദീഖ്​ ഹസൻ മെമോറിയൽ ദേശീയ അവാർഡ്​, ഉന്നത പഠനത്തിന്​ ഓരോ വർഷം നൂറ്​ വിദ്യാർഥികൾക്ക്​ പ്രൊഫ. കെ.എ സിദ്ദീഖ്​ ഹസൻ മെമോറിയൽ സ്​കോളർഷിപ്പ്​ എന്നിവയാണ്​ ഏർ​പ്പെടുത്തിയത്​. സ്​കോളർഷിപ്പ്​ വിതരണവും ചടങ്ങിൽ നടന്നു.

ഹ്യൂമൻ വെൽഫെയർ ഫൗണ്ടേഷൻ ചെയർമാൻ ഡോ. സിറാജ്​ ഹുസൈൻ​, ചീഫ്​ എക്സിക്യൂട്ടീവ്​ ഓഫീസർ പി.കെ നൗഫൽ, സലീമുല്ലാ ഖാൻ എന്നിവർ സംസാരിച്ചു. ഫൗണ്ടേഷൻ ട്രസ്റ്റീ അബ്​ദുൽ ജബ്ബാർ സിദ്ദീഖി, ശഫീഅ്​ മുനീസ് തുടങ്ങിയവർ സംബന്ധിച്ചു.