മൗനി അമാവാസി ദിനം ആചരിച്ച്​, നദിയിൽ മുങ്ങി, പ്രാർഥനയോടെ പ്രിയങ്ക ഗാന്ധി

പ്രയാഗ്​രാജ്​: മൗനി അമാവാസി ദിനം ആചരിച്ച്​ കോൺഗ്രസ്​ നേതാവ്​ പ്രിയങ്ക ഗാന്ധി. ഉത്തർപ്രദേശിലെ നദികളുടെ സംഗമത്തിൽ മുങ്ങികുളിച്ച്​ പ്രാർഥന ചടങ്ങുകൾ നടത്തിയായിരുന്നു പ്രിയങ്ക ഗാന്ധിയുടെ മടക്കം.

മകൾ മിറായക്കും എം.എൽ.എ ആരാധന മിശ്രക്കും ഒപ്പമാണ്​ പ്രിയങ്ക പ്രയാഗ്​ രാജിൽ എത്തിയത്​. കുളിക്കും പ്രാർഥനക്കും ശേഷം പ്രിയങ്ക മകൾക്കൊപ്പം ബോട്ടിൽ സഞ്ചരിക്കുകയും​ ചെയ്​തു.

അലഹാബാദിലെ നെഹ്​റു, ഗാന്ധി കുടുംബ വീടായ ആനന്ദ ഭവൻ പ്രിയങ്ക സന്ദർശിച്ചു. നിലവിൽ മ്യൂസിയമാണ്​ അവിടം.

കേന്ദ്രസർക്കാറിന്‍റെ കാർഷിക നിയമങ്ങൾക്കെതിരെ സഹാറൻപുരിൽ സംഘടിപ്പിച്ച കർഷകരുടെ മഹാപഞ്ചായത്തിൽ പ്രിയങ്ക ഗാന്ധി കഴിഞ്ഞദിവസം പ​ങ്കെടുത്തിരുന്നു. അടുത്തവർഷം നടക്കുന്ന നിയമസഭ തെ​രഞ്ഞെടുപ്പിന്​ മുന്നോടിയായി പാർട്ടിയെ യു.പിയിൽ ശക്തിപ്പെടുത്തുന്നതിന്‍റെ ചുമതല പ്രിയങ്കക്കാണ്​.

പ്രധാനമന്ത്രി നരേന്ദ്രമോദിയും ബി.ജെ.പി നേതാക്കളും കർഷകരെ അപമാനിക്കുകയാണെന്ന്​ പ്രിയങ്ക ആരോപിച്ചിരുന്നു. പൈശാചികമാണ്​ മൂന്ന്​ കാർഷിക നിയമങ്ങളും. കോൺഗ്രസിന്​ വോട്ട്​ ചെയ്​ത്​ അധികാരത്തിലെത്തിക്കുകയാണെങ്കിൽ ഈ മൂന്ന്​ നിയമങ്ങളും ഇല്ലാതാക്കാമെന്നും അവർ പറഞ്ഞു.