നഖം നീട്ടുകയും നീണ്ട കമ്മൽ ധരിക്കുകയും ചെയ്​തതിന്​ പ്രിൻസിപ്പൽ അടിച്ചു; പത്താം ക്ലാസുകാരി ജീവനൊട​ുക്കി

ഗുഡ്​ഗാവ്​: ഹരിയാനയിലെ ഗുഡ്​ഗാവിൽ പത്താം ക്ലാസ്​ വിദ്യാർഥിനി തൂങ്ങിമരിച്ചു. കൈവിരൽ നഖം നീട്ടി, നീളമേറിയ കമ്മൽ ധരിച്ചു, മൊബൈൽ ഫോൺ കൊണ്ടുവന്നു എന്നീ കാരണങ്ങൾ പറഞ്ഞ്​ മറ്റ്​ വിദ്യാർഥികളുടെ മുമ്പിൽ വെച്ച്​ കുട്ടിയെ പ്രിൻസിപ്പൽ ശിക്ഷിച്ചതിൽ മനംനൊന്താണ്​ കടുംകൈ ചെയ്​തതെന്ന്​ ബന്ധുക്കൾ ആരോപിച്ചു.

ഏപ്രിൽ ഒമ്പതാം തിയതിയാണ്​ പെൺകുട്ടി സീലിങ്​ ഫാനിൽ തുങ്ങി മരിച്ചത്​. ഏപ്രിൽ എട്ടാം തിയതി കുട്ടി അച്ചടക്ക ലംഘനം നടത്തിയെന്ന്​ കാണിച്ച്​ പ്രിൻസിപ്പൽ രക്ഷിതാക്കളെ സ്​കൂളിലേക്ക്​ വിളിപ്പിച്ചിരുന്നു. കൈവിരൽ നഖം നീട്ടി, നീളമേറിയ കമ്മൽ ധരിച്ചു, മൊബൈൽ ഫോൺ കൊണ്ടുവന്നു എന്നിവയായിരുന്നു കുറ്റം. കുട്ടിയെ സ്​കൂളിൽ നിന്നും പുറത്താക്കുമെന്നായിരുന്നു ഭീഷണി.

അന്ന്​ വീട്ടിൽ മടങ്ങിയെത്തിയ പെൺകുട്ടി ആരോടും സംസാരിക്കാനോ ഭക്ഷണം കഴിക്കാനോ തയാറായില്ല. ​കുട്ടിയെ സ്​കൂളിൽ നിന്ന്​ പുറത്താക്കരുതെന്ന്​ അപേക്ഷിക്കാനായി മാതാപിതാക്കൾ പിറ്റേ ദിവസം വീണ്ടും സ്​കൂളിലെത്തി. ഇൗ പ്രാവശ്യം അതേ സ്​കൂളിൽ ഒമ്പതാം ക്ലാസിൽ പഠിക്കുന്ന മകനെയും കൂടെ കൂട്ടിയിരുന്നു.

'അവരെ വീണ്ടും കണ്ടതോടെ പ്രിൻസിപ്പൽ ദേഷ്യത്തിലായി. ആ സമയം രണ്ട്​ കുട്ടികളെയും കുറിച്ച്​ അയാൾ പരാതി പറഞ്ഞു. അവരെ ഒഴിവാക്കുമെന്നും പറഞ്ഞു. ഓൺലൈൻ ക്ലാസിന്​ വേണ്ടിയാണ്​ കുട്ടി മൊബൈൽ ​ഫോൺ ഉപയോഗിച്ചതെന്ന്​ സഹോദരൻ പ്രിൻസിപ്പലിനോട്​ പറഞ്ഞെങ്കിലും അദ്ദേഹം അത്​ ചെവികൊണ്ടില്ല. ഓഫിസ്​ വിട്ട്​ പുറത്ത്​ പോകാനായിരുന്നു അദ്ദേഹത്തിന്‍റെ കൽപന' -മരിച്ച പെൺകുട്ടിയുടെ ബന്ധു പറഞ്ഞു​.

സ്​കൂളിൽ നിന്ന്​ മടങ്ങിയെത്തിയ ശേഷം സ്​കൂളിൽ നിന്ന്​ പുറത്താക്കരുതെന്ന്​ ഒരിക്കൽ കൂടി അപേക്ഷിക്കാമെന്ന്​ മാതാപിതാക്കൾ പെൺകുട്ടിയെ അറിയിച്ചു. ഇത്​ കേട്ട കുട്ടി ഒന്നും മിണ്ടാ​െത ഒന്നാം നിലയിലുള്ള റൂമിൽ കയറി കതകടച്ചു. സമയം ഏറെ കഴിഞ്ഞിട്ടും കുട്ടിയെ പുറത്ത്​ കാണാത്തതിനെ തുടർന്ന്​ സഹോദരൻ വാതിലിൽ മുട്ടിയെങ്കിലും പ്രതികരണമുണ്ടായില്ല. വാതിൽ പൊളിച്ച്​ അകത്ത്​ കടന്നപ്പോൾ സീലിങ്​ ഫാനിൽ തൂങ്ങിയ നിലയിലായിരുന്നു പെൺകുട്ടി. ആശുപത്രിയിൽ എത്തിച്ചെങ്കിലും മരിച്ചു.

പെൺകുട്ടിയെ പ്രിൻസിപ്പൽ ശകാരിക്കുകയും മറ്റ്​ കുട്ടികളുടെ മുമ്പിൽ വെച്ച്​ അടിക്കുകയും ചെയ്​തതായി സഹപാഠികൾ പറഞ്ഞു. ഇതിന്​ പിന്നാലെ ഏപ്രിൽ 14ന്​ കുട്ടിയുടെ ബന്ധു പൊലീസ്​ സ്​റ്റേഷനിൽ പരാതി നൽകി. ആത്മഹത്യാ പ്രേരണാ കുറ്റം ചുമത്തി പ്രിൻസിപ്പലിനെതിരെ അന്വേഷണം ആരംഭിച്ചു. ഇതുവരെ ആരെയും അറസ്റ്റ്​ ചെയ്​തില്ല.