Begin typing your search above and press return to search.
proflie-avatar
Login
exit_to_app
exit_to_app
Homechevron_rightNewschevron_rightIndiachevron_rightപ്രശാന്ത്​ കിഷോർ...

പ്രശാന്ത്​ കിഷോർ കോൺഗ്രസിൽ ചേരും? ഗാന്ധി കുടുംബവുമായുള്ള ചർച്ചക്കുപിന്നാലെ അഭ്യൂഹം ശക്​തം

text_fields
bookmark_border
Prashant Kishor
cancel

ന്യൂഡൽഹി: രാജ്യത്തെ രാഷ്​ട്രീയ വൃത്തങ്ങളിൽ ഏറെ ചർച്ച ചെയ്യപ്പെടുന്ന തെരഞ്ഞെടുപ്പ്​ തന്ത്രജ്​ഞൻ പ്രശാന്ത്​ കിഷോർ കോൺഗ്രസിൽ ചേർന്നേക്കുമെന്ന്​ അഭ്യൂഹം. പശ്ചിമ ബംഗാളിൽ എല്ലാ കണക്കു​കൂട്ടലുകളും കാറ്റിൽപറത്തി മമത ബാനർജിയുടെ നേതൃത്വത്തിലുള്ള തൃണമൂൽ കോൺഗ്രസിന്​ തകർപ്പൻ വിജയം നേടിക്കൊടുത്തതടക്കം വിവിധ കക്ഷികളെ അധികാരത്തിന്‍റെ വഴിയിലേക്ക്​ ആനയിക്കുന്നതിൽ പ്രശാന്തിന്‍റെ തന്ത്രങ്ങൾ ഏറെ നിർണായകമായിരുന്നു. ഇന്ത്യൻ രാഷ്​ട്രീയത്തിലെ 'വിലപിടിപ്പുള്ള' ഈ ചാണക്യൻ കഴിഞ്ഞ ദിവസം കോൺഗ്രസ്​ നേതാക്കളായ സോണിയ ഗാന്ധി, രാഹുൽ ഗാന്ധി, പ്രിയങ്ക ഗാന്ധി എന്നിവരുമായി ഡൽഹിയിൽ ചർച്ച നടത്തിയിരുന്നു. ഇതിനു പിന്നാലെയാണ്​ അദ്ദേഹം കോൺഗ്രസിൽ ചേരുമെന്ന അഭ്യൂഹം ശക്​തമായത്​.

കേവലമൊരു രാഷ്​ട്രീയ ചർച്ചകൾക്കപ്പുറം വലിയ മാനങ്ങളുള്ള കൂടിക്കാഴ്ചയാണ്​ കോൺഗ്രസ്​ നേതാക്കളുമായി പ്രശാന്ത്​ കിഷോർ നടത്തിയതെന്നാണ്​ സൂചന. 2024ലെ ലോക്​സഭാ തെരഞ്ഞെടുപ്പിൽ കൂടുതൽ പ്രാധാന്യമുള്ള റോളായിരിക്കും അദ്ദേഹത്തി​േന്‍റതെന്നും റിപ്പോർട്ടുകളുണ്ട്​. പുറത്ത്​ പ്രചരിക്കപ്പെടുന്നതുപോലെ ഉത്തർപ്രദേശ്​, പഞ്ചാബ്​ നിയമസഭാ തെര​​ഞ്ഞെടുപ്പ്​ മുൻനിർത്തിയുള്ള തന്ത്രങ്ങൾക്കായി മാത്രമായാണ്​ കോൺഗ്രസ്​ നേതൃത്വവുമായി പ്രശാന്ത്​ ചർച്ച നടത്തിയതെന്നത്​ ശരിയല്ലെന്നും കൂടുതൽ വലിയ കാര്യങ്ങളാണ്​ കൂടിക്കാഴ്ചയിൽ വിഷയമായതെന്ന​ും എൻ.ഡി.ടി.വി റിപ്പോർട്ടുചെയ്​തു. 2024 ലോക്​സഭാ തെരഞ്ഞെടുപ്പിന്​ കോൺഗ്രസ്​ ഒരുങ്ങു​േമ്പാൾ കിഷോറിന്​ സുപ്രധാന റോൾ ഉണ്ടാകു​മെന്നതിന്‍റെ സൂചനകളാണ്​ ഉയരുന്നതെന്നും റിപ്പോർട്ടിൽ ചൂണ്ടിക്കാട്ടുന്നു.

'ഇപ്പോൾ ചെയ്​തുകൊണ്ടിരിക്കുന്നത്​ തുടരാൻ ഞാൻ ആഗ്രഹിക്കുന്നില്ല. ചെയ്​തിടത്തോളം മടുത്തു. ജീവിതത്തിൽ ഒരു ഇടവേള എടുക്കാനും മറ്റെന്തെങ്കിലും ചെയ്യാനുമുള്ള സമയമാണിത്​'- രണ്ടു മാസം മുമ്പ്​ പ്രശാന്ത്​ കിഷോർ എൻ.ഡി.ടി.വിക്ക്​ നൽകിയ അഭിമുഖത്തിൽ പറഞ്ഞതിങ്ങനെ. വീണ്ടും രാഷ്​ട്രീയത്തിൽ ചേരുമോ എന്ന്​ ചോദിച്ചപ്പോൾ താൻ പരാജയപ്പെട്ട രാഷ്​ട്രീയക്കാരനാണെന്നായിരുന്നു മറുപടി. നിതീഷ്​ കുമാറിന്‍റെ ജനതാദളിൽ ചേർന്ന പ്രശാന്ത്​ പിന്നീട്​ പാർട്ടി വിട്ടിരുന്നു.

ബംഗാളിനു പുറമെ ഈയിടെ തമിഴ്​നാട്ടിൽ അധികാരത്തിനെത്തിയ ഡി.എം.കെ മുന്നണിക്കു വേണ്ടി പിന്നണിയിൽ കരുക്കൾ നീക്കിയതും പ്രശാന്ത്​ കിഷോറായിരുന്നു. അസമിൽ കുടുംബവുമൊത്ത്​ തേയില കൃഷിയിൽ ശ്രദ്ധിക്കാൻ ​പോവുകയാണെന്നാണ്​ മേയിൽ അദ്ദേഹം പറഞ്ഞത്​.

2017ൽ കോൺഗ്രസും സമാജ്​വാദി പാർട്ടിയും ചേർന്ന സഖ്യത്തിനു​േവണ്ടി യു.പി തെരഞ്ഞെടുപ്പിൽ തന്ത്രങ്ങൾ മെനഞ്ഞത്​ കിഷോറിന്‍റെ ടീമായിരുന്നു. എന്നാൽ, സഖ്യം ബി.ജെ.പിക്കുമുന്നിൽ അടിയറവ്​ പറഞ്ഞു. അതേസമയം, പഞ്ചാബിൽ കോൺഗ്രസിനെ അധികാരത്തിലേക്ക്​ നയിക്കുകയും ചെയ്​തു. അതിനുശേഷം കോൺഗ്രസിന്‍റെ പ്രവർത്തനരീതികളെ പ്രശാന്ത്​ കിഷോർ വിമർശിച്ചിരുന്നു. 'നൂറുവർഷം പഴക്കമുള്ള പാർട്ടിയാണ്​ കോൺഗ്രസ്​. അവർക്ക്​ അവരുടേതായ പ്രവർത്തന രീതിയാണുള്ളത്​. പ്രശാന്തോ മറ്റുള്ളവരോ നിർദേശിക്കുന്ന വഴികളിൽ പ്രവർത്തിക്കാൻ അവർക്കാവില്ല. തങ്ങൾക്ക്​ ചില പ്രശ്​നങ്ങളുണ്ടെന്നും അത്​ പരിഹരിക്കാൻ എന്തെങ്കിലും ചെയ്യണമെന്നും കോൺഗ്രസ്​ തിരിച്ചറിയണം' -മുമ്പ്​ ​പ്രശാന്ത്​ കിഷോർ പറഞ്ഞതിങ്ങനെ.

Show Full Article
Girl in a jacket

Don't miss the exclusive news, Stay updated

Subscribe to our Newsletter

By subscribing you agree to our Terms & Conditions.

Thank You!

Your subscription means a lot to us

Still haven't registered? Click here to Register

TAGS:Sonia GandhiPrashant KishorCongressRahul Gandhi
News Summary - Prashant Kishor To Join Congress? Speculation After Meeting With Gandhis
Next Story