മൊറ​ട്ടോറിയം: സർക്കാർ വിശദീകരണം തൃപ്​തികരം -ടിക്കാറാം മീണ

തിരുവനന്തപുരം: കാർഷിക വായ്​പകൾക്കുള്ള മൊറ​ട്ടോറിയവുമായി ബന്ധപ്പെട്ട്​ സർക്കാർ വി​ശദീകരണം തൃപ്​തികരമെന് ന്​ മുഖ്യ തെരഞ്ഞെടുപ്പ്​ ഓഫീസർ ടിക്കാറാം മീണ. അടിയന്തരമായി ഉത്തരവിറക്കേണ്ട സാഹചര്യം സർക്കാർ വിശദീകരിച്ചിട്ട ുണ്ടെന്നും അദ്ദേഹം പറഞ്ഞു. കാർഷിക വായ്​പകൾക്ക്​ മൊറട്ടോറിയം ദീർഘിപ്പിച്ച്​ ഉത്തരവിറക്കാൻ അനുവദിക്കണമെന്ന സർക്കാർ അപേക്ഷ കേന്ദ്ര തെരഞ്ഞെടുപ്പ്​ കമീഷന്​ കൈമാറും.

കർഷക ആത്മഹത്യകൾ പെരുകുന്ന പശ്ചാത്തലത്തിലായിരുന്ന ു കാർഷിക വായ്​പകൾക്കും കർഷകരുടെ കാർഷികേതര വായ്​പകൾക്കുമുള്ള മോറ​ട്ടോറിയം ദീർഘിപ്പിക്കാൻ സർക്കാർ തീരുമാനിച്ചത്​. ഡിസംബർ 31 വരെ നീട്ടാനാണ്​ മാർച്ച്​ അഞ്ചിന്​ ചേർന്ന മന്ത്രിസഭാ യോഗത്തിൽ തീരുമാനമെടുത്തത്​. ഇതു സംബന്ധിച്ച്​ ഉത്തരവിറക്കാനുള്ള നിർദേശം മന്ത്രിസഭായോഗം ചീഫ്​ സെക്രട്ടറിക്ക്​ നൽകിയിരുന്നെങ്കിലും ചീഫ്​ സെക്രട്ടറി ഉത്തരവിറക്കിയിരുന്നില്ല. ഇതിനിടെ ഈ മാസം പത്തിന്​ തെരഞ്ഞെടുപ്പ്​ പ്രഖ്യാപനം വരികയും മാതൃകാ പെരുമാറ്റ ചട്ടം നിലവിൽവരികയും ചെയ്​തതോടെ ഉത്തരവിറക്കാൻ സാധിക്കാത്ത സ്ഥിതിയായി. ഇതിനു പിന്നാലെ നടന്ന മന്ത്രിസഭായോഗത്തിൽ ചീഫ്​ സെക്രട്ടറിയെ മുഖ്യമന്ത്രി നിശിതമായി വിമർശിച്ചിരുന്നു.

തുടർന്ന്​ ഉത്തരവിറക്കുന്നതിനായുള്ള നടപടികൾ സ്വീകരിച്ചിട്ടുണ്ടെന്നും അതിനുള്ള അനുമതി വേണമെന്നും ആവശ്യപ്പെട്ട്​ ചീഫ്​ സെക്രട്ടറി മുഖ്യ തെരഞ്ഞെടുപ്പ്​ ഓഫീസർക്ക്​ ഫയൽ നൽകിയിരുന്നു. എന്നാൽ അടിയന്തരമായി ഉത്തരവിറക്കേണ്ടതി​​െൻറ കൃത്യമായ കാരണങ്ങൾ സർക്കാർ വിശദീകരിച്ചിട്ടില്ലെന്ന്​ ചൂണ്ടിക്കാട്ടി ഈ ഫയൽ തെരഞ്ഞെടുപ്പ്​ ഓഫീസർ സർക്കാറിന്​ തിരിച്ചു നൽകി. ഇതും മന്ത്രിസഭായോഗത്തിൽ ചീഫ്​ സെക്രട്ടറിക്കെതിരെ വിമർശനത്തിനിടയാക്കി.

ഇതേ തുടർന്ന്​ സംസ്ഥാന സർക്കാറും ചീഫ്​ സെക്രട്ടറിയും കൃത്യമായ വിശദീകരണം മുഖ്യ തെരഞ്ഞെടുപ്പ്​ ഓഫീസർക്ക്​ കൈമാറി. ഇന്ന്​ രാവിലെ ഫയൽ പരിശോധിച്ച ടിക്കാറാം മീണ വിശദീകരണം തൃപ്​തികരമാണെന്ന്​ അറിയിക്കുകയായിരുന്നു. ഇക്കാര്യത്തിൽ അന്തിമ തീരുമാനം കൈക്കൊള്ളാൻ മുഖ്യ തെരഞ്ഞെടുപ്പ്​ ഓഫീസർക്ക്​ സാധിക്കില്ല. അതിനാൽ കേന്ദ്ര തെരഞ്ഞെടുപ്പ്​ കമീഷന്​ ഇന്ന്​ തന്നെ അപേക്ഷ കൈമാറുമെന്ന്​ അദ്ദേഹം പറഞ്ഞു.