ലോക്​ഡൗണിനെതിരെ അഹമ്മദാബാദിൽ പ്രതിഷേധം; പൊലീസ്​ ടിയർഗ്യാസ്​ പ്രയോഗിച്ചു

അഹമ്മദാബാദ്​: കടുത്ത ലോക്​ഡൗൺ നിയന്ത്രണങ്ങൾക്കെതിരെ ഗുജറാത്ത്​ തലസ്ഥാനമായ അഹമ്മദാബാദിൽ പ്രതിഷേധം. പൊലീസും ലോക്​ഡൗണിനെതിരെ പ്രതിഷേധം നടത്തുന്നവരും തമ്മിലാണ്​ സംഘർഷമുണ്ടായത്​. വെള്ളിയാഴ്​ചയായിരുന്നു സംഭവം.

കോവിഡ്​ രൂക്ഷമായതിനെ തുടർന്ന്​ എല്ലാ കടകളും അഹമ്മദാബാദിൽ അടച്ചിടാൻ അധികൃതർ നിർദേശം നൽകിയിരുന്നു. പാൽ വിൽക്കുന്ന കടകളും മെഡിക്കൽ ഷോപ്പുകളും മാത്രം തുറന്നാൽ മതിയെന്നാണ്​ നിർദേശം. ഇതേ തുടർന്നാണ്​ അഹമ്മദാബാദിലെ ഷാപൂർ മേഖലയിൽ സംഘർഷമുണ്ടായത്​. ലോക്​ഡൗൺ നിയന്ത്രണങ്ങൾ ലംഘിച്ചായിരുന്നു പ്രതിഷേധം. 

പ്രതിഷേധവുമായി രംഗത്തെത്തിയ ഒരുപറ്റം ആളുകൾ പൊലീസിനെതിരെ കല്ലെറിയുകയായിരുന്നുവെന്ന്​ കമ്മീഷണർ ആശിഷ്​ ഭാട്ടിയ പറഞ്ഞു. പൊലീസ്​ ടിയർ ഗ്യാസ്​ പ്രയോഗിച്ചു. സ്ഥിതിഗതികൾ ഇപ്പോൾ ശാന്തമാണെന്നും അദ്ദേഹം വ്യക്​തമാക്കി. ഗുജറാത്തിൽ കോവിഡ്​ ബാധ ഏറ്റവും കൂടിയ സ്ഥലങ്ങളിലൊന്നാണ്​ അഹമ്മദാബാദ്​. ഏകദേശം 5000ത്തോളം പേർക്കാണ്​ രോഗബാധ സ്ഥിരീകരിച്ചത്​.