75 വർഷം കൊണ്ട്​ ഇന്ത്യയുണ്ടാക്കിയതെല്ലാം പ്രധാനമന്ത്രി വിൽക്കുന്നു -രാഹുൽഗാന്ധി

ന്യൂഡൽഹി: പൊതുസ്വത്ത്​ കുത്തകകൾക്ക്​ കൈമാറി നാലു വർഷം കൊണ്ട്​ ആറുലക്ഷം കോടി രൂപ സമാഹരിക്കാൻ മോദിസർക്കാർ പ്രഖ്യാപിച്ച ദേശീയ ധനസമാഹരണ പദ്ധതി​ക്കെതിരെ വിമർശനവുമായി കോൺഗ്രസ്​. സർക്കാർ നീക്കത്തിനെതിരെ കോൺഗ്രസ്​ നേതാവ്​ രാഹുൽ ഗാന്ധി, മുൻ ധനമന്ത്രി പി. ചിദംബരം എന്നിവർ വാർത്ത സമ്മേളനത്തിലൂടെ പ്രതിഷേധം രേഖപ്പെടുത്തി. 70 കൊല്ലമായി രാജ്യത്ത്​ ഒരു വികസനവുമില്ലെന്ന്​ പറയുന്നവർ തന്നെ രാജ്യത്തിന്‍റെ 70 ​കൊല്ലത്തെ ആസ്​തികൾ വിൽക്കുകയാണെന്ന്​ രാഹുൽ പറഞ്ഞു.

''യുക്തിസഹമായ ​സ്വകാര്യവത്​കരണമാണ്​ കോൺഗ്രസ്​ നടത്തിയത്​. റെയിൽവേ, വാതക പൈപ്പ്​​ലൈൻ, വൈദ്യുതി ലൈനുകൾ, ദേശീയപാതകൾ തുടങ്ങി നിർണായക മേഖലകൾ പതിച്ചു കൊടുക്കുകയാണ്​ സർക്കാർ ചെയ്യുന്നത്​. നഷ്​ടത്തിലോടുന്ന, വിപണിയിൽ കാര്യമായ സ്വാധീനം ചെലുത്താത്ത സ്​ഥാപനങ്ങളാണ്​ കോൺഗ്രസ്​ സ്വകാര്യവത്​കരിച്ചത്​. സ്വകാര്യ മേഖലയോട്​ കിടപിടിക്കുന്ന പൊതുമേഖല സ്​ഥാപനങ്ങളെ ​തൊട്ടില്ല.

ചങ്ങാതികളായ മൂന്നോ നാലോ വ്യവസായിക​െള കൊഴുപ്പിക്കാനാണ്​ മോദി ശ്രമിക്കുന്നത്​. ഇതിനകം ചില വിമാനത്താവളവും തുറമുഖവുമൊക്ക ആരുടെ കൈയിലേക്കാണ്​ പോയതെന്ന്​ എല്ലാവർക്കുമറിയാം. അവർക്കു തന്നെ വീണ്ടും തീറെഴുതുകയാണ്​. ദേശീയ ധനസമാഹരണ പരിപാടി വ്യവസായികൾക്കുള്ള സൗജന്യ സമ്മാനമാണ്​. വിൽപനക്കു വെക്കുന്ന മേഖലകളിലെ തൊഴിലവസരങ്ങൾ യുവാക്കൾക്ക്​ നഷ്​ടപ്പെടും. യുവജനങ്ങൾക്ക്​ പണി നൽകുന്നത്​ കോർപറേറ്റുകളുടെ ഉത്തരവാദിത്തമല്ല. അനൗപചാരിക മേഖലയേയും ഇല്ലാതാക്കും'' -രാഹുൽ ഗാന്ധി പറഞ്ഞു.