കോവിഡ്​ ഇടവേളക്ക്​ ശേഷം മോദിയുടെ വിദേശയാത്രകൾക്ക്​ വീണ്ടും തുടക്കമാകുന്നു; ആദ്യ രാജ്യം ബംഗ്ലാദേശ്​

ന്യൂഡൽഹി: കോവിഡ്​ മഹാമാരിക്ക്​ ശേഷം പ്രധാനമന്ത്രി നരേന്ദ്ര മോദി വീണ്ടും വിദേശ സന്ദർശനങ്ങൾക്ക്​ തുടക്കമിടുന്നു. ബംഗ്ലാദേശ് പ്രധാനമന്ത്രി ശൈഖ്​ ഹസീനയുടെ ക്ഷണം സ്വീകരിച്ച് മോദി ഈ മാസം 26, 27 തിയതികളില്‍ അയൽരാജ്യം സന്ദര്‍ശിക്കും. കേന്ദ്ര വിദേശകാര്യ മന്ത്രാലയമാണ് ഇക്കാര്യം അറിയിച്ചത്.

ശൈഖ്​ ഹസീനയുടെ പിതാവും ബംഗ്ലാദേശ്​ രാഷ്​ട്രപിതാവുമായ ശൈഖ്​ മുജീബുര്‍ റഹ്മാന്‍റെ ജന്മവാര്‍ഷികത്തോട് അനുബന്ധിച്ച പരിപാടികളിൽ മോദി പ​ങ്കെടുക്കും.

മാർച്ച്​ 26ന്​ ബംഗ്ലാദേശ്​ ദേശീയ ദിനാഘോഷ പരിപാടിയിലെ മുഖ്യാതിഥി മോദിയായിരിക്കും. 2015 ലാണ് അദ്ദേഹം അവസാനമായി ബംഗ്ലാദേശ് സന്ദര്‍ശിച്ചത്.

ശൈഖ്​ ഹസീനയുമായി ഉഭയകക്ഷി വിഷയങ്ങളിൽ ചർച്ച നടത്തുന്ന മോദി പ്രസിഡന്‍റ്​ മുഹമ്മദ്​ അബ്​ദുൽ ഹമീദുമായും വിദേശകാര്യമന്ത്രി എ.കെ. അബ്​ദുൽ മുഅ്​മിനുമായും കൂടിക്കാഴ്ച നടത്തും.