തെ​രഞ്ഞെടുപ്പ്​ ലക്ഷ്യം; മോദി മന്ത്രിസഭ ഉടൻ പുനസംഘടിപ്പിച്ചേക്കും

ന്യൂഡൽഹി: വരും തെരഞ്ഞെടുപ്പുകൾ മുന്നിൽകണ്ട്​ പ്രധാനമന്ത്രി നരേന്ദ്രമോദി സർക്കാറി​െൻറ നേതൃത്വത്തിലുള്ള കേന്ദ്രമന്ത്രിസഭ പുനസംഘടിപ്പിക്കും. 2024ലെ ലോക്​സഭ തെരഞ്ഞെടുപ്പും അടുത്തവർഷം നടക്കാനിരിക്കുന്ന അഞ്ചുസംസ്​ഥാനങ്ങളിലെ നിയമസഭ തെരഞ്ഞെടുപ്പും ലക്ഷ്യമാക്കിയാണ്​ വിപുലീകരണം.

കോൺഗ്രസ്​ വിട്ട്​ ബി.ജെ.പിയിലെത്തിയ ജ്യോതിരാദിത്യ സിന്ധ്യക്കായിരിക്കുംമുൻതൂക്കം. മധ്യപ്രദേശിൽ കോൺഗ്രസിനെ പരാജയപ്പെടുത്തി ബി.ജെ.പിയെ അധികാരത്തിലെത്തിക്കാൻ സഹായിച്ച പ്രധാന വ്യക്തിയെന്ന നിലക്കാകും പരിഗണന. കൂടാതെ അസമിൽ ഹിമാന്ത ബിശ്വ ശർമയെ രണ്ടാം തവണയും അധികാരത്തിലെത്തിക്കാൻ പരിശ്രമിച്ച അസം മുഖ്യമന്ത്രി സർബാനന്ദ സോനേവാളിനെയും മന്ത്രിസഭയിൽ ഉൾപ്പെടുത്തും.

ലോക്​ജനശക്തി പാർട്ടി നേതാവ്​ ചിരാഗ്​ പാസ്വാനെതിരെ പാർട്ടിയിൽനിന്ന്​ തന്നെ യുദ്ധം ചെയ്​ത പശുപതി പരസിന്​ കഴിഞ്ഞവർഷം രാം വിലാസ്​ പാസ്വാ​െൻറ മരണത്തോടെയുണ്ടായ ഒഴിവിലേക്ക്​ പരിഗണന കിട്ടുമെന്നുമാണ്​ സൂചന.

അതേസമയം നിതീഷ്​ കുമാറി​െൻറ ജനതാദൾ യുനൈറ്റഡി​ന്​ (ജെ.ഡി.യു) മന്ത്രിസ്ഥാനം ലഭിക്കുമോ എന്ന കാര്യം വ്യക്തമല്ല. എന്നാൽ രണ്ടുമന്ത്രിസ്​ഥാനമെങ്കിലും ലഭിക്കുമെന്നാണ്​ നിതീഷ്​ കുമാറി​െൻറ പ്രതീക്ഷ. നേതാക്കളായ ലല്ലൻ സിങ്​, രാംനാഥ്​ താക്കൂർ, സന്തോഷ്​ കുഷ്വാഹ എന്നിവർക്കായിരിക്കും മുൻതൂക്കമെന്നാണ്​ വിവരം.

ബി.ജെ.പി നേതാവ്​ സു​ശീൽ മോദി, മഹാരാഷ്​ട്ര നേതാവ്​ നാരായൻ റാനെ, ഗുജറാത്തി​​െൻറയും ബിഹാറി​െൻറയും ചുമതലയുള്ള നേതാവ്​ ഭൂപേന്ദ്ര യാദവ്​ എന്നിവരും മന്ത്രിസ്​ഥാനം പ്രതീക്ഷിക്കുന്നുണ്ട്​.

മന്ത്രിമാരുടെ പ്രകടനം വിലയിരുത്തിയ ശേഷമാണ്​ പുനസംഘടന നീക്കം. 24 മന്ത്രിമാരുടെ പ്രകടനം വിലയിരുത്തുന്നതിനായി പ്രധാനമന്ത്രിയുടെയും ആഭ്യന്തരമന്ത്രി അമിത്​ ഷായുടെയും നേതൃത്വത്തിൽ യോഗം ചേർന്നിരുന്നു. ഇതിൽ മന്ത്രിമാരുടെ പ്രകടനത്തിൽ തൃപ്​തിയില്ലെന്നാണ്​ സൂചന. കോവിഡ്​ പ്രതിരോധ വീഴ്​ചകൾ മറക്കുന്നതിനായാകും പെട്ടന്നുള്ള​ മന്ത്രിസഭ പുനസംഘടന.

മോദി സർക്കാർ രണ്ടാമതും അധികാരത്തിലെത്തിയതിന്​ ശേഷം ഇതുവരെ മന്ത്രിസഭ പുനസംഘടിപ്പിച്ചിട്ടില്ല. ​സർക്കാറി​നെതിരെ പ്രതിഷേധങ്ങൾ രൂക്ഷമായതോടെ തെരഞ്ഞെടുപ്പിന്​ മുന്നോടിയായി ഉത്തർപ്രദേശ്​ മന്ത്രിസഭയും പുനസംഘടിപ്പിച്ചേക്കുമെന്നാണ്​ വിവരം.