കോവിഡ് രോഗികളുടെ എണ്ണം കുതിച്ചുയരുന്നതിനിടെ വാക്സിൻ നിർമാതാക്കളുമായി ചർച്ചക്ക് പ്രധാനമന്ത്രി

ന്യൂഡൽഹി: രാജ്യത്ത് കോവിഡ് രോഗികളുടെ എണ്ണം കുതിച്ചുയരുന്നതിനിടെ കോവിഡ് വാക്സിൻ നിർമാതാക്കളുമായി പ്രധാനമന്ത്രി നരേന്ദ്ര മോദി ഇന്ന് ചർച്ച നടത്തും. വൈകുന്നേരം ആറിന് വീഡിയോ കോൺഫറൻസ് വഴിയാണ് ചർച്ച. മെയ് ഒന്നിന് 18 വയസ്സിന് മുകളിലുള്ള എല്ലാവർക്കും കോവിഡ്​ വാക്​സിൻ നൽകുമെന്ന്​ കേന്ദ്ര സർക്കാർ പ്രഖ്യാപിച്ചതിനും, സംസ്​ഥാനങ്ങൾക്ക്​ വാക്സിൻ ഡോസുകൾ നിർമാതാക്കളിൽനിന്ന് നേരിട്ട് വാങ്ങാനും അനുമതി നൽകിയതിന് പിന്നാലെയാണ് ചർച്ച നടക്കുന്നത്.

കോവിഡ്​ വ്യാപനം സൃഷ്​ടിച്ച അടിയന്തര സാഹചര്യങ്ങൾക്കിടയിൽ സർക്കാർ തലത്തിൽ തിരക്കിട്ട ചർച്ചകളിലാണ് പ്രധാനമ​ന്ത്രി നരേന്ദ്ര മോദി. മുതിർന്ന ഉദ്യോഗസ്​ഥരും മ​ന്ത്രിമാരുമായി ഇന്നലെ രാവിലെ മോദി ചർച്ച നടത്തിയിരുന്നു. പിന്നാലെ​ രാജ്യത്തെ പ്രമുഖ ഡോക്​ടർമാരുമായി വിഡിയോ കോൺ​ഫറൻസ്​ വഴിയും ചർച്ച നടന്നു.

തെരഞ്ഞെടുപ്പ് പ്രചാരണവുമായി നടക്കാതെ, ഏറ്റവും നിർണായകമായ ഘട്ടത്തിൽ ഡൽഹിയിലിരുന്ന്​ ഭരണകാര്യങ്ങൾ ഏകോപിപ്പിക്കാനാണ്​ പ്രധാനമന്ത്രി ശ്രമിക്കേണ്ടതെന്ന്​ കഴിഞ്ഞ ദിവസം കോൺഗ്രസും മറ്റു പ്രതിപക്ഷ പാർട്ടികളും ഓർമപ്പെടുത്തിയിരുന്നു. കോവിഡ്​ പ്രതിസന്ധിക്കിടയിലും പ്രചാരണ യാത്രകൾ നടത്തി പ്രധാനമന്ത്രി തന്നെ സാമൂഹിക അകലത്തി​െൻറ മാനദണ്ഡം കാറ്റിൽ പറത്തുന്ന സാഹചര്യം സൃഷ്​ടിക്കുന്നുവെന്ന ​കുറ്റപ്പെടുത്തലും ഉയർന്നിരുന്നു.

കൂടുതൽ വിഭാഗക്കാർക്ക്​ വാക്​സിൻ നൽകുന്നതോടെ കോവിഡിനെതിരായ പോരാട്ടം ശക്​തിപ്പെടുത്താനാകുമെന്നാണ്​​ കേന്ദ്ര സർക്കാറിന്‍റെ പ്രതീക്ഷ. വാക്സിൻ നിർമാതാക്കളോട്​ ഉൽപാദനം വർധിപ്പിക്കാനും 50 ശതമാനം സംസ്ഥാനങ്ങൾക്ക്​ വിതരണം ചെയ്യാനുമാണ് കേന്ദ്ര സർക്കാറിെൻറ നിർദേശം.