17 ലക്ഷം ദീപങ്ങൾ തെളിയിച്ച് ഗിന്നസ് റെക്കോഡിടാൻ അയോധ്യ; ചടങ്ങിൽ മോദി പ​ങ്കെടുക്കും

അയോധ്യ: ദീപാവലി ആഘോഷങ്ങളുടെ ഭാഗമായി പ്രധാനമന്ത്രി നരേന്ദ്ര മോദി അയോധ്യയിലെത്തും. ദീപോത്സവ് ചടങ്ങിലും അദ്ദേഹം സംബന്ധിക്കും. ലേസർ, മ്യൂസിക് ഷോയിൽ മോദി പ​ങ്കെടുക്കും. ഇതിന് ശേഷം രാം ലല്ലാ വിരാജ്മാനിൽ അദ്ദേഹം പൂജയും നടത്തും.

ഒക്ടോബർ 21നാണ് മൂന്ന് ദിവസം നീണ്ടുനിൽക്കുന്ന ദീപോത്സവ് തുടങ്ങിയത്. 17 ലക്ഷം ദീപങ്ങൾ തെളിയിച്ച് ഗിന്നസ് ബുക്കിൽ റെക്കോഡിടാനാണ് അയോധ്യയുടെ ശ്രമം.അനിമേറ്റഡ് ടാബ്ലോ, രാമലീല ​ടാബ്ലോ, വിവിധ സംസ്ഥാനങ്ങളുടെ തനത് നൃത്തരൂപങ്ങൾ എന്നിവയും ദീപോത്സവത്തിന്റെ ഭാഗമായി ഉണ്ടാകും.

ത്രേതായുഗത്തെ അനുസ്മരിക്കുന്ന കമാനങ്ങളും ഒരുക്കുമെന്ന് പരിപാാടിയുടെ സംഘാടകർ അറിയിച്ചു. കഴിഞ്ഞ വർഷവും ദീപാവലി ദിനത്തിൽ മോദി അയോധ്യയിൽ എത്തുകയും പരിപാടിയിൽ പ​ങ്കെടുക്കുകയും ചെയ്തിരുന്നു.