യുക്രെയ്​ൻ വിദ്യാർഥികളോട്​ മുൻസർക്കാറുകളെ കുറ്റം പറഞ്ഞ്​​ മോദി; 'എന്നോട്​ രോഷം പ്രകടിപ്പിച്ചവരോട്​ സഹതാപം'

ന്യൂഡൽഹി: യുക്രെയ്​നിലെ യുദ്ധക്കെടുതിയിൽനിന്ന്​ മടങ്ങിയെത്തിയ ഇന്ത്യൻ വിദ്യാർഥികളോട്,​ അവരുടെ ഈ അവസ്​ഥക്ക്​ കാരണം മുൻ സർക്കാറുകളുടെ കഴിവുകേടാണെന്ന്​ പ്രധാനമന്ത്രി നരേന്ദ്ര മോദി. വിദ്യാർഥികളുമായി വാരണാസിയിൽവെച്ച്​ നടത്തിയ​ കൂടിക്കാഴ്ചയിലാണ്​ പ്രധാനമന്ത്രി മുൻസർക്കാറുകളെ കുറ്റപ്പെടുത്തിയത്​. രാജ്യത്ത് തുടക്കം മുതൽ ശരിയായ മെഡിക്കൽ വിദ്യാഭ്യാസ നയങ്ങളുണ്ടായിരുന്നെങ്കിൽ വിദ്യാർത്ഥികൾ വിദേശത്തേക്ക് പോകാൻ നിർബന്ധിതരാകുമായിരുന്നി​ല്ലെന്ന് അദ്ദേഹം പറഞ്ഞു.

"വിദൂര രാജ്യത്ത്, ഇത്രയും ചെറുപ്പത്തിൽ, തനിയെ​യാണ്​​ കടുത്ത അനുഭവങ്ങളിലൂടെ​​ നിങ്ങൾ കടന്നുപോകേണ്ടി വന്നത്​. നിങ്ങൾ എത്രമാത്രം മാനസിക ക്ലേശം അനുഭവിച്ചുവെന്ന് എനിക്ക് ഊഹിക്കാനാകും. ഏറെ ബുദ്ധിമുട്ടിയാണെങ്കിലും സർക്കാർ ഇപ്പോൾ വിദ്യാർത്ഥികളെ അവിടെനിന്ന്​ ഒഴിപ്പിച്ച്​ കൊണ്ടിരിക്കുകയാണ്. നമ്മുടെ രാജ്യം ശക്തമാകണം, ഈ ബുദ്ധിമുട്ടുകൾക്കെല്ലാം പരിഹാരം അതിലാണ്. നമ്മുടെ രാജ്യത്തിന് തുടക്കം മുതൽ ശരിയായ മെഡിക്കൽ വിദ്യാഭ്യാസ നയങ്ങൾ ഉണ്ടായിരുന്നെങ്കിൽ, നിങ്ങൾ ആരും പുറത്തുപോകേണ്ടി വരില്ലായിരുന്നു എന്ന് ഞാൻ വിശ്വസിക്കുന്നു" മോദി പറഞ്ഞു.

യുക്രെയ്​നിൽനിന്ന്​ ഒഴിപ്പിക്കാൻ വൈകിയതിന്​ പ്രധാനമന്ത്രിയോടും സർക്കാരിനോടും രോഷം പ്രകടിപ്പിച്ചവരോട്​ സഹതാപമുണ്ടെന്നും അദ്ദേഹം പറഞ്ഞു. 'തന്നോടും സർക്കാരിനോടും രോഷം പ്രകടിപ്പിച്ച വിദ്യാർത്ഥികളോടും അവരുടെ കുടുംബങ്ങളോടും തനിക്ക് സഹതാപമുണ്ട്​. ബുദ്ധിമുട്ടുകൾ നേരിടുമ്പോൾ അത്തരം വികാരങ്ങൾ സ്വാഭാവികമാണ്​. എന്നാൽ, അത്​ അധികകാലം നിലനിൽക്കില്ല.' -അദ്ദേഹം പറഞ്ഞു.

ഇന്ത്യയിലേക്ക് മടങ്ങാൻ കഴിയുമെന്ന എല്ലാ പ്രതീക്ഷകളും തങ്ങൾ ഉപേക്ഷിച്ചിരുന്നതായി കൂടിക്കാഴ്ചയിൽ പ​ങ്കെടുത്ത ഒരു വിദ്യാർത്ഥി പ്രധാനമന്ത്രിയോട് പറഞ്ഞു. 'ഞങ്ങൾ ടിക്കറ്റ്​ ബുക്ക്​ ചെയ്ത വിമാനങ്ങൾ റദ്ദാക്കി. എന്നാൽ, ഇന്ത്യൻ എംബസിയും സർക്കാരും ആളുകളെ ഒഴിപ്പിക്കാൻ തുടങ്ങിയപ്പോൾ പുതിയ പ്രതീക്ഷ ലഭിച്ചു. ഇന്ത്യൻ ഗവൺമെന്റിന് നന്ദി... ഇന്ത്യൻ ഗവൺമെന്റിന്റെ സഹായമില്ലാതെ ഞങ്ങൾക്ക് സുരക്ഷിതമായി തിരിച്ചുവരാൻ കഴിയുമായിരുന്നുവെന്ന് ഞാൻ കരുതുന്നില്ല' -വിദ്യാർഥി പറഞ്ഞു.

"നമ്മുടെ ഇന്ത്യ വളരെ വലുതാണ്, മറ്റ് രാജ്യങ്ങളിലെ ആളുകൾ പലായനത്തിനായി ഇന്ത്യൻ പതാകയാണ്​ ഉപയോഗിക്കുന്നത്​" മറ്റൊരു വിദ്യാർഥി പറഞ്ഞു.

കഴിഞ്ഞ രണ്ട് ദിവസത്തിനിടെ രണ്ട് ഇന്ത്യൻ വിദ്യാർത്ഥികളാണ് യുക്രെയ്​നിൽ മരിച്ചത്. ഇന്ന്​ ഒരു വിദ്യാർഥിക്ക്​ വെടിയേൽക്കുകയും ചെയ്തിട്ടുണ്ട്​. സർക്കാരിന്റെ കണക്കനുസരിച്ച് കഴിഞ്ഞ ഏതാനും ആഴ്ചകൾക്കുള്ളിൽ 17,000 ഇന്ത്യൻ പൗരന്മാർ യുക്രെയ്ൻ വിട്ടു. മാർച്ച് 10 ഓടെ സംഘർഷമേഖലയിൽ കുടുങ്ങിക്കിടക്കുന്ന മുഴുവൻ ഇന്ത്യൻ പൗരന്മാരെയും ഒഴിപ്പിക്കാൻ കഴിയുമെന്നാണ്​ പ്രതീക്ഷ.