''ഊർജ്ജസ്വലനായ, കാഴ്​ചപ്പാടുള്ള നേതാവ്'' ​; നരേന്ദ്ര മോദിയെ പുകഴ്​ത്തി സുപ്രീംകോടതി ജഡ്​ജി

ന്യൂഡൽഹി: പ്രധാനമന്ത്രി നരേന്ദ്ര മോദിയെ പുകഴ്​ത്തി സുപ്രീംകോടതി ജഡ്​ജി ജസ്​റ്റിസ്​ എം.ആർ ഷാ. മോദി ജനപ്രിയനും ഊർജ്ജസ്വലനും കാഴ്​ചപ്പാടുള്ളവനുമായ നേതാവാണെന്ന്​ എം.എർ. ഷകാ അഭിപ്രായപ്പെട്ടു. ഗുജറാത്ത്​ ഹൈകോടതിയുടെ 50ാം വാർഷികാഘോഷ ചടങ്ങിൽ സംസാരിക്കുകയായിരുന്നു അദ്ദേഹം.

ഓൺലൈൻവഴി നടന്ന ചടങ്ങിൽ ഗുജറാത്ത്​ ഹൈകോടതിയുടെ വാർഷികത്തോടനുബന്ധിച്ച്​ തപാൽ സ്​റ്റാമ്പ്​ പ്രകാശനവും നടന്നു. ചടങ്ങിൽ മോദിക്കൊപ്പം പ​ങ്കെടുക്കാനായത്​ വലിയ ഭാഗ്യമായാണ്​ കണക്കാക്കുന്നതെന്നും സുപ്രീംകോടതി ജഡ്​ജി പറഞ്ഞു.

''ഗുജറാത്ത്​ ഹൈകോടതിയുടെ സ്​മരണ നിലനിർത്തുന്നതിനായുള്ള തപാൽ സ്​റ്റാമ്പ്​ ജനപ്രിയ, ഊർജ്ജസ്വലനായ, സ്​നേഹം നിറഞ്ഞ, കാഴ്​ചപ്പാടുള്ള നേതാവ്​ പ്രധാനമന്ത്രി നരേന്ദ്രമോദി പ്രകാശനം ചെയ്യുന്ന ഈ സുപ്രധാന ചടങ്ങിൽ പ​​ങ്കെടുക്കാൻ സാധിച്ചതിൽ സന്തോഷവും അഭിമാനവും തോന്നുന്നു. ഈ ചടങ്ങിൽ പ​​​ങ്കെടുക്കാനായത്​ സവിശേഷ ഭാഗ്യമായാണ്​ കണക്കാക്കുന്നത്​.'' -ജസ്​റ്റിസ്​ ഷാ പറഞ്ഞു.

മുമ്പ്​ ജസ്​റ്റിസ്​ അരുൺ മിശ്രയും മോദിയോട്​ ആരാധന പ്രകടിപ്പിച്ച്​ രംഗത്ത്​ വന്നിരുന്നു. 2020 സെപ്​തംബറിൽ വിരമിച്ച അരുൺ മിശ്ര 1500ഓളം വരുന്ന കാലഹരണപ്പെട്ട നിയമം എടുത്തു കളഞ്ഞതിന്​ കഴിഞ്ഞ വർഷം ഫെബ്രുവരിയിൽ മോദിയെ പുകഴ്​ത്തി രംഗത്ത്​ വന്നിരുന്നു.

ജസ്റ്റിസ് മിശ്രയുടെ മോദി പുകഴ്​ത്തലിൽ ബാർ അസോസിയേഷൻ ഓഫ് ഇന്ത്യ ആശങ്കയും നിരാശയും പ്രകടിപ്പിച്ചിരുന്നു. അത്തരം നടപടികൾ നിഷ്​പക്ഷതയേയും നീതിന്യായ സ്വാതന്ത്ര്യത്തേയും സംബന്ധിച്ച ധാരണകളെ ദുർബലപ്പെടുത്താനേ സാധിക്കൂ എന്ന്​ അഭിപ്രായപ്പെട്ട ബാർ അസോസിയേഷൻ ജസ്​റ്റിസ്​ മിശ്രയുടെ പ്രസ്​താവനയെ വിമർശിക്കുകയും അത്​ 'നീതിന്യായ സ്വാതന്ത്ര്യത്തെ മോശമായി പ്രതിഫലിപ്പിക്കുന്നു'എന്ന്​ പ്രമേയംത്തിലൂടെ അഭിപ്രായപ്പെടുകയും ചെയ്​തിരുന്നു.