ഇന്ത്യയെ കോവിഡ്​ സുരക്ഷിത ഇടമായി ലോകം കാണുന്നു; വാക്​സിനേഷനിലെ വിജയം ഓരോ പൗരനും അവകാശപ്പെട്ടത്​ -മോദി

ന്യൂഡൽഹി: 100 കോടി ഡോസ്​ വാക്​സിനെന്ന കഠിനമായ ലക്ഷ്യം ഇന്ത്യ വിജയകരമായി പൂർത്തികരീച്ചുവെന്ന്​ പ്രധാനമന്ത്രി നരേന്ദ്ര മോദി. 100 കോടി ഡോസ്​ വാക്​സിനെന്നത്​ വെറുമൊരു സംഖ്യയല്ല. ചരിത്രത്തിലെ പുതിയ അധ്യായമാണെന്നും മോദി പറഞ്ഞു. രാജ്യത്തെ അഭിസംബോധന ചെയ്​ത്​ സംസാരിക്കുകയായിരുന്നു പ്രധാനമന്ത്രി.

ഇന്ത്യയിലെ ഓരോ പൗരനും അവകാശപ്പെട്ടതാണ്​ ഈ വിജയം. നേട്ടത്തിന്​ ഇന്ത്യയിലെ എല്ലാ പൗരൻമാരേയും അഭിനന്ദിക്കുകയാണ്​. ഇന്ത്യയെ കോവിഡ്​ സുരക്ഷിത ഇടമായി ഇപ്പോൾ ലോകം കാണുന്നുവെന്നും പ്രധാനമന്ത്രി പറഞ്ഞു.

എല്ലാവർക്കുമൊപ്പം എല്ലാവരുടേയും വികസനമെന്ന മുദ്രവാക്യത്തിന്‍റെ ഉത്തമ ഉദാഹരണമാണ്​ ഇന്ത്യയുടെ വാക്​സിനേഷൻ കാമ്പയിൻ. വാക്​സിനേഷൻ ​പദ്ധതിയിൽ വി.ഐ.പി സംസ്​കാരം ഒഴിവാക്കാൻ സാധിച്ചു. എല്ലാവരേയും ഒരു പോലെ പരിഗണിച്ചുവെന്നും അദ്ദേഹം പറഞ്ഞു. ശാസ്​ത്രത്തെ അടിസ്ഥാനമാക്കിയാണ്​ ഇന്ത്യയുടെ വാക്​സിനേഷൻ പുരോഗമിച്ചതെന്നും മോദി കൂട്ടിച്ചേർത്തു.

കഴിഞ്ഞ വർഷം പാത്രം കൊട്ടാൻ പറഞ്ഞപ്പോഴും ദീപം തെളിയിക്കാൻ ആവശ്യപ്പെട്ടപ്പോഴും പലരും അതിനെ കളിയാക്കി. എന്നാൽ, അത്​ ഇന്ത്യയുടെ ഐക്യത്തെയാണ് വെളിപ്പെടുത്തിയത്​. രാജ്യത്തെ എല്ലാ ജനങ്ങളും മെയ്​ഡ്​ ഇൻ ഇന്ത്യയുടെ ശക്​തി ഇപ്പോൾ അറിയുന്നുണ്ടെന്നും അദ്ദേഹം പറഞ്ഞു.