രാ​ത്രി കർഫ്യു പരിഗണിക്കണം; ഒമിക്രോണിനെ പ്രതിരോധിക്കാൻ പ്രാദേശിക നിയന്ത്രണങ്ങളാവാമെന്ന്​ കേന്ദ്രം

ന്യൂഡൽഹി: രാജ്യത്ത്​ ഒമിക്രോൺ കേസുകൾ ഉയരുന്ന പശ്ചാത്തലത്തിൽ, ഉത്സവ സീസണിന് മുന്നോടിയായി പ്രാദേശിക നിയന്ത്രണങ്ങൾ ഏർപ്പെടുത്തുന്നത് പരിഗണിക്കാൻ സംസ്​ഥാനങ്ങൾക്ക്​ കേന്ദ്ര നിർദേശം. കോവിഡ് വ്യാപനം കൂടുതലായ പ്രദേശങ്ങള്‍ കണ്ടെയി​ൻമെന്‍റ്​, ബഫര്‍ സോണുകളായി പ്രഖ്യാപിക്കാമെന്നും ആവശ്യമെങ്കില്‍ രാത്രി കര്‍ഫ്യൂ ഏർപ്പെടുത്താമെന്നും കേന്ദ്രം അറിയിച്ചു.

ആഘോഷദിനങ്ങളോട് അനുബന്ധിച്ചുള്ള ഒത്തുചേരലുകള്‍ക്ക് നിയന്ത്രണം ഏർപ്പെടുത്തുക, കോവിഡ് മാനദണ്ഡങ്ങള്‍ പാലിക്കുന്നുണ്ടെന്ന് ഉറപ്പു വരുത്തുക, രോഗവ്യാപനം കൂടുതലുള്ള പ്രദേശങ്ങളില്‍ നിന്നും സാമ്പിളുകൾ ജനിതക ശ്രേണീകരണ പരിശോധനക്ക്​ അയക്കുക തുടങ്ങിയ മാർഗനിർദേശങ്ങളും കേന്ദ്രം സംസ്​ഥാനങ്ങൾക്ക്​ നൽകി.​ പ്രധാനമന്ത്രിയുടെ അധ്യക്ഷതയിലാണ്​ വ്യാഴാഴ്​ച അവലോകന യോഗം ചേർന്നത്​.

മധ്യപ്രദേശിൽ രാത്രി കർഫ്യൂ പ്രഖ്യാപിച്ചു. അടിയന്തര സാഹചര്യം വന്നാൽ നേരിടാനുള്ള സന്നാഹങ്ങൾ വർധിപ്പിക്കുകയും മരുന്ന്​ സംഭരിക്കുകയും ചെയ്യുന്നുണ്ടെന്ന്​ ഡൽഹി മുഖ്യമന്ത്രി അരവിന്ദ്​​ കെജ്​രിവാൾ വാർത്തസമ്മേളനത്തിൽ പറഞ്ഞു. 15 ഓക്സിജൻ ടാങ്കറുകൾ ഉടൻ ഡൽഹിയിൽ എത്തിക്കും. പ്രതിദിനം മൂന്ന്​ ലക്ഷം പരിശോധനകൾ നടത്താനുള്ള സൗകര്യമുണ്ട്​. അടിയന്തര സാഹചര്യം ഉണ്ടായാൽ പ്രതിദിനം ലക്ഷം കേസുകൾ കൈകാര്യം ചെയ്യാൻ ഡൽഹിക്കാകുമെന്നും കെജ്​രിവാൾ അറിയിച്ചു.

ഇന്ത്യയിൽ 16 സംസ്ഥാനങ്ങളിലായി 300 ഓളം​ ഒമിക്രോൺ കേസുകളാണ്​ റിപ്പോർട്ട്​ ചെയ്​തത്​. 104 പേർ സുഖം പ്രാപിച്ചു. മഹാരാഷ്​ട്രയിൽ 65, ഡൽഹിയിൽ 64, തെലങ്കാന 24, കർണാടക 19, രാജസ്ഥാൻ 21, എന്നിങ്ങനെയാണ് കേസുകൾ സ്ഥിരീകരിച്ചത്​. അതിനിടെ, രാജ്യത്ത് 18 വയസ്സിനു മുകളിലുള്ളവരിൽ സമ്പൂർണ വാക്​സിനേഷൻ 60 ശതമാനം കടന്നതായി കേന്ദ്ര ആരോഗ്യമന്ത്രാലയം അറിയിച്ചു. കണക്കു കൂട്ടിയതിലും നേരത്തെ ഈ ലക്ഷ്യം പൂർത്തിയാക്കാൻ രാജ്യത്തിന് സാധിച്ചതായും മന്ത്രാലയം വ്യക്തമാക്കി. 7,495 പേർക്കാണ്​ പുതുതായി കോവിഡ്​ ബാധിച്ചത്​.