നൈപുണ്യ വികസന പദ്ധതികൾ ലഭ്യമാക്കാൻ ഇനി 'പി.എം ദക്ഷ്​'​ വെബ്​സൈറ്റും മൊബൈൽ ആപ്പും

ന്യൂഡൽഹി: നൈപുണ്യ വികസന പദ്ധതികൾക്കായി വെബ്​സൈറ്റും ആപ്പും പുറത്തിറക്കി കേന്ദ്രം. പിന്നാക്ക വിഭാഗങ്ങൾ, പട്ടികജാതി/പട്ടികവർഗ വിഭാഗങ്ങൾ, ശുചീകരണത്തൊഴിലാളികൾ തുടങ്ങിയവർക്ക്​ നൈപുണ്യ വികസന പദ്ധതികൾ എളുപ്പത്തിൽ ലഭ്യമാക്കുകയാണ്​ ലക്ഷ്യം. ഇതിനായി പി.എം ദക്ഷ്​ (PM-DAKSH) പോർട്ടൽ, മൊബൈൽ ആപ്പ്​ എന്നിവ കേന്ദ്ര സാമൂഹിക നീതി വകുപ്പ്​ മന്ത്രി വിരേന്ദ്ര കുമാർ ശനിയാഴ്ച പുറത്തിറക്കി.

യുവാക്കളെ ലക്ഷ്യമിട്ടാണ്​ പോർട്ടലും ആപ്പും പുറത്തിറക്കിയിരിക്കുന്നത്​. പിന്നാക്ക വിഭാഗങ്ങൾക്ക്​ നൈപുണ്യ വികസന പദ്ധതികളുടെ ആനുകൂല്യം എളുപ്പത്തിൽ ലഭ്യമാക്കുകയാണ്​ ലക്ഷ്യമെന്നും കേന്ദ്രമന്ത്രി പറഞ്ഞു.

പദ്ധതിക്ക്​ കീഴിൽ ലക്ഷ്യം വെക്കുന്നവർക്ക്​ നൈപുണ്യ വികസന പരിശീലന പരിപാടികൾ, ഹ്രസ്വകാല പരിശീലന പരിപാടികൾ, ദീർഘകാല ​പരിശീലന പരിപാടികൾ, സംരംഭകത്വ വികസന പരിപാടികൾ തുടങ്ങിയവ ലഭ്യമാക്കുകയാണ്​ ലക്ഷ്യം. സർക്കാർ പരിശീലന സ്​ഥാപനങ്ങൾ, സ്​കിൽ കൗൺസലുകൾ എന്നിവകൾ വഴിയാണ്​ ഇവ സർക്കാർ നേതൃത്വത്തിൽ ലഭ്യമാക്കുക.

നൈപുണ്യ വികസന പരിപാടികളു​മായി ബന്ധപ്പെട്ട എല്ലാ വിവരങ്ങളും ഈ വെബ്​സൈറ്റിലൂടെയും ആപ്പിലൂടെയും ലഭ്യമാകും. കൂടാതെ, തൊട്ടടുത്ത കേന്ദ്രത്തിൽ നടക്കുന്ന നൈപുണ്യ വികസന പരിശീലന പരിപാടികൾ അറിയുന്നതിനും രജിസ്റ്റർ ചെയ്യാനും ഇതിലൂടെ സാധിക്കും.

രജിസ്റ്റർ ചെയ്​തവരുടെ വ്യക്തിവിവങ്ങൾ വെബ്​സൈറ്റിലൂടെ അപ്​​ലോഡ്​ ചെയ്യാൻ കഴിയും. പരിശീലന പരിപാടിയിൽ മുഖവും കണ്ണും സ്​കാൻ ചെയ്​ത്​ ഹാജർ രേഖപ്പെടുത്താനും ഇതുവഴി സാധിക്കുമെന്നും പറയുന്നു.