പ്ലസ്​ടു വിദ്യാർഥിക്ക്​ മൂന്ന്​ ആശുപത്രികൾ ചികിത്സ നിഷേധിച്ചു; നാലാമത്തെ ആശുപത്രിയിൽ മരണം

കൊൽക്കത്ത: മൂന്ന്​ ആശുപത്രികൾ ചികിത്സ നിഷേധിച്ച പ്ലസ്​ടു വിദ്യാർഥി നാലാമത്തെ ആശുപത്രിയിൽ മരിച്ചു. സുബ്രജിത് ചട്ടോപാധ്യായ എന്ന 18കാരനാണ്​ കൊൽക്കത്ത മെഡിക്കൽ കോളജ് (കെ.എം.സി.എച്ച്) ആശുപത്രിയിൽ ദാരുണാന്ത്യം സംഭവിച്ചത്​. പ്രമേഹരോഗിയായ സുബ്രജിത്തിന്​ കോവിഡ്​ സ്​ഥിരീകരിച്ചിരുന്നു.

ചികിത്സിച്ചില്ലെങ്കിൽ താൻ ആശുപത്രിയിൽവെച്ച്​ ആത്മഹത്യ ചെയ്യുമെന്ന് അമ്മ ഭീഷണി മുഴക്കിയ ശേഷമാണ് നാലാമത്തെ ആശുപത്രിയിൽ മകനെ അഡ്​മിറ്റ്​ ചെയ്​തതെന്ന്​ പിതാവ്​ പറഞ്ഞു. ഇവിടെയും കൃത്യമായ പരിചരണം ലഭിച്ചില്ലെന്ന്​ അദ്ദേഹം ആരോപിച്ചു. ‘‘മകന് കെ‌.എം‌.സി.‌എച്ചിൽ ഒരു മരുന്നും നൽകിയില്ല. ഞങ്ങൾക്ക് പ്രവേശനമില്ലാത്ത ഒരു വാർഡിലേക്ക് അവനെ കൊണ്ടുപോയി. ആരോഗ്യ സ്​ഥിതിയെകുറിച്ച് അന്വേഷിച്ചുകൊണ്ടിരുന്ന ഞങ്ങളെ ആരും ഒരു തരത്തിലും സഹായിച്ചില്ല. അന്വേഷണ വിഭാഗത്തിൽ ചോദിച്ചപ്പോഴാണ്​ രാത്രി 9.30ഓടെ മകൻ മരിച്ചുവെന്ന് അറിഞ്ഞത്​’’ - അദ്ദേഹം പറഞ്ഞു. 

വെള്ളിയാഴ്ച രാവിലെ സുബ്രജിത്തിന് ശ്വാസതടസ്സം അനുഭവപ്പെട്ടിരുന്നു. തുടർന്ന്​ ആദ്യം കാമർഹട്ടിയിലെ ഇ.എസ്.ഐ ആശുപത്രിയിൽ കൊണ്ടുപോയി. അവിടെ ഐ.സി.യുവിൽ ഒഴിവില്ലെന്ന്​ പറഞ്ഞ്​ മടക്കിയയച്ചു. പിന്നെ സ്വകാര്യ നഴ്സിങ്​ ഹോമിൽ കൊണ്ടുപോയി. അവർ കോവിഡ് ടെസ്റ്റ് നടത്തി. മണിക്കൂറുകൾക്ക്​ ശേഷം ഫലം പോസിറ്റീവ് ആണെന്നും അവിടെ കിടക്കയില്ലെന്നും അവർ പറഞ്ഞു. അത്രയും സമയം ഞങ്ങൾ ആംബുലൻസിൽ കാത്തിരിക്കുകയായിരുന്നു -സുബ്രജിത്തി​​െൻറ പിതാവ് പറഞ്ഞു.

പിന്നീട്​ പോയ സാഗർ ദത്ത സർക്കാർ ആശുപത്രിയിലും ചികിത്സ നിഷേധിച്ചു. ഒടുവിൽ പൊലീസിനെ ബന്ധപ്പെട്ടപ്പോഴാണ്​ കെ.എം.സി.എച്ചിലേക്ക് കൊണ്ടുപോകാൻ നിർദേശിച്ചതെന്ന്​ സുബ്രജിത്തി​​െൻറ അമ്മ പറഞ്ഞു. "കെ.‌എം‌.സി.‌എച്ച്​ അധികൃതരും ആദ്യം അവനെ പ്രവേശിപ്പിക്കാൻ സമ്മതിച്ചില്ല. മകൻ കോവിഡ് രോഗിയാണെന്നും ചികിത്സിച്ചില്ലെങ്കിൽ ഇവിടെ ആത്മഹത്യ ചെയ്യുമെന്നും എ​​െൻറ ഭാര്യ ഭീഷണിപ്പെടുത്തിയ ശേഷം അവർ അഡ്​മിറ്റ്​ ചെയ്യുകയായിരുന്നു’’ പിതാവ് പറഞ്ഞു. 

"കൃത്യസമയത്ത് ചികിത്സിച്ചിരുന്നെങ്കിൽ ഞങ്ങളുടെ മകൻ ജീവിച്ചിരിക്കുമായിരുന്നു. കെ.എം.സി.എച്ചിൽ ചികിത്സ ലഭിച്ചില്ല. ഡോക്​ടർമാരുടെ അശ്രദ്ധ മൂലമാണ് മകൻ മരിച്ചത്​’’ അദ്ദേഹം ആരോപിച്ചു. ഡോക്​ടർമാരുടെ ഭാഗത്ത്​ വീഴ്​ച സംഭവിച്ചിട്ടുണ്ടോയെന്ന കാര്യം പരിശോധിക്കുമെന്ന് പശ്ചിമ ബംഗാൾ ആരോഗ്യ സേവന ഡയറക്ടർ അജോയ് ചക്രബർത്തി മാധ്യമപ്രവർത്തകരോട്​ പറഞ്ഞു.