നിസാമുദ്ദീൻ ദർഗക്കകത്ത്​ സ്​ത്രീപ്രവേശനം ആവശ്യപ്പെട്ട്​ ഹരജി

ന്യൂഡൽഹി: ഡൽഹിയിലെ ഹസ്രത്ത്​ നിസാമുദ്ദീൻ ദർഗയിലെ ഖബറിടം സന്ദർശിക്കാൻ സ്​ത്രീകളേയും അനുവദിക്കണമെന്ന്​ ആവശ് യപ്പെട്ട്​ ഡൽഹി ​ൈഹകോടതിയിൽ പൊതുതാൽപര്യ ഹരജി. ദർഗയിൽ എല്ലാ മതസ്ഥർക്കും സന്ദർശനാനുമതിയുണ്ടെന്നും എന്നാൽ, പ്രധാന ഖബറിടങ്ങൾ സന്ദർശിക്കാൻ സ്​ത്രീകളെ​ അനുവദിക്കുന്നില്ലെന്നും ചൂണ്ടിക്കാട്ടി പുണെയിൽനിന്നുള്ള നിയമ വിദ്യാർഥികളാണ്​ ഹരജി നൽകിയിരിക്കുന്നത്​.

ദര്‍ഗയില്‍ സ്ത്രീകള്‍ക്ക് പ്രവേശനം ലഭിക്കാത്തത്​ ചൂണ്ടിക്കാണിച്ച് ഡല്‍ഹി പൊലീസ് ഉൾപ്പെടെയുള്ള അധികാരികള്‍ക്ക് പരാതി നല്‍കിയിട്ടും നടപടിയോ മറുപടിയോ ലഭിക്കാതിരുന്നതുകൊണ്ടാണ് ഹൈകോടതിയെ സമീപിച്ചിരിക്കുന്നതെന്ന്​ ഹരജിക്കാര്‍ പറഞ്ഞു.

അജ്മീര്‍ ദര്‍ഗയിലും ഹാജി അലി ദര്‍ഗയിലും ഇത്തരം വിവേചനമില്ല. സ്ത്രീകള്‍ക്ക് പ്രവേശനം നിഷേധിക്കുന്നത് ഭരണഘടനാ വിരുദ്ധമാണ്​. സ്​ത്രീപ്രവേശനത്തിനായി മാര്‍ഗനിര്‍ദേശങ്ങള്‍ സ്വീകരിക്കാന്‍ കേന്ദ്രസര്‍ക്കാര്‍, ഡല്‍ഹി സര്‍ക്കാര്‍, പൊലീസ്, ദര്‍ഗ ട്രസ്​റ്റ്​ എന്നിവര്‍ക്ക് നിര്‍ദേശം നല്‍കണമെന്നും ഹരജിയിൽ ആവശ്യപ്പെട്ടു. ഹരജി അടുത്ത ആഴ്​ച പരിഗണിക്കും.