പണമുണ്ടാക്കാൻ രഹസ്യലാബിൽ 'മ്യൂ മ്യൂ' മയക്കുമരുന്നുണ്ടാക്കി വിൽപന; പി.എച്ച്​ഡിക്കാരൻ പിടിയിൽ

ഹൈദരാബാദ്​: നഗരത്തിലെ രഹസ്യലാബിൽ ലക്ഷങ്ങൾ വിലവരുന്ന മയക്കുമരുന്നുണ്ടാക്കി വിറ്റ രസതന്ത്ര ഗവേഷകനെ ഡിപാർട്​മെൻറ്​ ഓഫ്​ റെവന്യു ഇൻറലിജൻസ്​ (ഡി.ആർ.ഐ) അറസ്​റ്റ്​ ചെയ്​തു. മ്യൂ മ്യൂ എന്നറിയപ്പെടുന്ന മെഫിഡ്രോണാണ്​ ഇയാൾ രഹസ്യലാബിൽ നിര്‍മിച്ചു വിൽപന നടത്തിയത്​. 4 മീഥൈൽമെഥ്കാത്തിനോൺ, 4 മീഥൈൽ എഫിഡ്രോൺ എന്നീ പേരുകളിലും അറിയപ്പെടുന്ന ഈ മയക്കുമരുന്ന് ഇയാള്‍ സ്വന്തമായി നിര്‍മിച്ചെടുക്കുകയായിരുന്നുവെന്ന്​ ഇന്ത്യ ടുഡെ റിപോർട്ട്​ ചെയ്​തു.

രസതന്ത്രത്തിൽ പി.എച്ച്ഡി നേടിയ 45കാരനായ ശ്രീനിവാസ റാവുവാണ്​ അറസ്​റ്റിലായത്​. മയക്കുമരുന്ന്​ കൈമാറ്റത്തിനിടെയാണ്​ പ്രതിയെ ഡി.ആർ.​ഐ അറസ്​റ്റ്​ ചെയ്​തത്​. സംഭവ സമയം 63.12 ലക്ഷം രൂപ വിലവരുന്ന 3.156 കിലോഗ്രാം മെഫിഡ്രോണും പിടികൂടി. പിന്നാലെ ഇയാളുടെ താമസ സ്​ഥലത്ത്​ നടത്തിയ പരിശോധനയിൽ 12.40 ലക്ഷം രൂപയും 112 ഗ്രാം മയക്ക്​ മരുന്നും കണ്ടെത്തി.

നഗരത്തിൻെറ പ്രാന്തപ്രദേശത്തുള്ള ലാബിൽ നിന്നും മയക്കുമരുന്ന്​ നിര്‍മിക്കാൻ ഉപയോഗിക്കുന്ന 219.5 കിലോയോളം അസംസ്കൃത വസ്തുക്കളും കണ്ടെടുത്തിട്ടുണ്ട്. ഈ അസംസ്കൃത വസ്തുക്കൾ ഉപയോഗിച്ച്​ 15 മുതൽ 20 കിലോഗ്രാം വരെ മയക്കുമരുന്ന് നിർമിക്കാൻ സാധിക്കുമെന്ന്​ ​അധികൃതർ പറഞ്ഞു.

രസതന്ത്രത്തിൽ പി.എച്ച്ഡി നേടിയ പ്രതി മുമ്പ്​ ഒരു മരുന്നു നിര്‍മാണ കമ്പനിയിലാണ് ജോലി ചെയ്​തിരുന്നത്​. ഒരു വര്‍ഷത്തിനിടെ നൂറു കിലോയിലധികം മയക്കുമരുന്ന്​ ഇയാള്‍ നിര്‍മിച്ചു വിറ്റിട്ടുണ്ട്​. മുംബൈ കേന്ദ്രീകരിച്ചു പ്രവര്‍ത്തിക്കുന്ന സംഘത്തെ കേന്ദ്രീകരിച്ചാണ്​ കേസിലെ അന്വേഷണം പുരോഗമിക്കുന്നത്​. കേസിലെ പ്രധാന സൂ​ത്രധാരൻ ഉൾപ്പെടെ രണ്ട് പേരെ വെള്ളിയാഴ്ച ഡി.ആർ.ഐ അറസ്​റ്റ്​ ചെയ്​തിരുന്നു.

1985ലെ നാര്‍ക്കോട്ടിക് ഡ്രഗ്സ് ആൻഡ്​ സൈക്കോട്രോപിക് സബ്സ്റ്റൻസസ് ആക്ട് പ്രകാരം നിരോധിച്ച മയക്കുമരുന്നാണ് മെഫിഡ്രോൺ.