കുതിപ്പ്​ കൊല്ലും വേഗത്തിൽ; ഇന്ധനക്കൊള്ളയിൽ മറ്റു രാജ്യങ്ങളെ പിന്നിലാക്കി ഇന്ത്യ

രാജ്യത്ത്​ ഇന്ധന വില ഓരോ ദിനവും കൂട്ടി 100 കടത്തി പെട്രോൾ കമ്പനികളും അനുഗ്രഹാശിസ്സുകളുമായി ഒപ്പംനിന്ന്​ സർക്കാറും ഓരോ ഇന്ത്യക്കാരന്‍റെയും ഉറക്കം കെടുത്തു​േമ്പാൾ ഒപ്പമെത്താൻ 'പാടുപെട്ട്​' മറ്റു രാജ്യങ്ങൾ. ഇന്ത്യയിൽ വിവിധ സംസ്​ഥാനങ്ങളിൽ വില ഇതിനകം 100 കടന്നുകഴിഞ്ഞു. കേരളത്തിലും പ്രിമിയം പെട്രോൾ 100 രൂപക്കു മേലെത്തി. സാധാരണ പെട്രോളിന്​ വില സെഞ്ച്വറി അടിക്കാൻ മൂന്നു രൂപയിൽ താഴെ മാത്രം ബാക്കി. തെരഞ്ഞെടുപ്പ്​ കണ്ട മാർച്ച്​, ഏപ്രിൽ മാസങ്ങളിൽ വില ഉയർത്താതെ ക്ഷമയോടെ നിന്ന പെട്രോളിയം കമ്പനികളാണ്​ അതുകഴിഞ്ഞതിന്‍റെ രണ്ടാം നാൾ മുതൽ തുടർച്ചയായി വില കൂട്ടിക്കൊണ്ടിരിക്കുന്നത്​. അന്താരാഷ്​ട്ര വിപണിയിലെ ചെറിയ വർധനക്കൊപ്പം സർക്കാറുകളുടെ കണക്കറ്റ നികുതിയും ചേരു​േമ്പാൾ വർധന എവിടെ ചെന്നുതൊടുമെന്ന ആധിയിലാണ്​ ജനം.

നികുതി വേട്ട

ആഗോള വിപണിയിൽ എണ്ണ വില കുറഞ്ഞുനിന്ന ഘട്ടങ്ങളിൽ പോലും നികുതി പിരിക്കാൻ ആവേശം മുന്നിൽനിന്നപ്പോൾ ഇന്ത്യയിൽ വില കുതിക്കുന്നതായിരുന്നു കാഴ്ച. കഴിഞ്ഞ വർഷം ഡിസംബറിനും കഴിഞ്ഞ ഏപ്രിലിനുമിടയിൽ അസംസ്​കൃത എണ്ണക്ക്​ ആഗോള വിപണിയിൽ വില കുറഞ്ഞുനിന്നപ്പോഴും ഇന്ത്യയിൽ മാത്രം വില കൂടി, പല തവണ. കഴിഞ്ഞ മാസം മാത്രം രാജ്യത്ത്​ കൂടിയത്​ ​പെട്രോളിന്​ അഞ്ചു രൂപയും ഡീസലിന്​ ആറു രൂപയുമാണ്​.

2019 ജനുവരിയിലുണ്ടായിരുന്നതിനെക്കാൾ ചെറിയ വില വർധനയേ രണ്ടു വർഷത്തിനിടെ അന്താരാഷ്​ട്ര വിപണിയിൽ സംഭവിച്ചുള്ളൂ. പക്ഷേ, അന്ന്​ ഡൽഹിയിൽ 68.75 രൂപയായിരുന്ന വില ഇത്രയും കാലത്തിനിടെ കുതിച്ച്​ 100നടുത്തെത്തി. കേന്ദ്ര ഭരണം നിലനിൽക്കുന്ന ഇവിടെ മാത്രം 58.6 ശതമാനമാണ്​ നികുതിയായി സർക്കാറുകൾ പിരിച്ചെടുക്കുന്നത്​.

2014 മേയ്​ മാസത്തിലുണ്ടായിരുന്നതിനെ അപേക്ഷിച്ച്​ 2021 മേയ്​ മാസമെത്തു​േമ്പാൾ അസംസ്​കൃത എണ്ണക്ക്​ വില 21 ശതമാനം കുറവാണ്​. പക്ഷേ, ആ സമയത്തിനിടെ നികുതിയും തീരുവയും കമീഷനും ചേർന്ന്​ വർധിച്ചത്​ 139 ശതമാനമാണ്​. കേന്ദ്രത്തിന്‍റെ നികുതി വിഹിതം മാത്രം 216 ശതമാനം വർധിച്ചു. ആനുപാതികമായി സംസ്​ഥാനങ്ങൾക്കും കൂടി. എന്നിട്ടും കുറക്കുന്നത്​ പോയിട്ട്​ ഇനിയും കൂടാ​െത സംരക്ഷിക്കാൻ പോലും ജനം തെരഞ്ഞെടുത്ത സർക്കാറുകൾ താൽപര്യം കാണിക്കുന്നില്ലെന്നതാണ്​ കൗതുകം.

അയൽ രാജ്യങ്ങളിൽ കുറവ്​, ഇന്ത്യ നമ്പർ വൺ

കോവിഡ്​ ഏറ്റവും ഭീതിദമായി രാജ്യത്തെ ഉലക്കുന്ന ദിനങ്ങളിലും അടിയന്തര നടപടിയായി രാജ്യം ജാഗ്രത പുലർത്തിവരുന്നത്​ പെട്രോൾ, ഡീസൽ വില കൂട്ടുന്നതിലാണ്​. ഇന്ത്യയിൽ വില 100 തൊ​ട്ടെങ്കിലും ചൈന, ബംഗ്ലദേശ്​, നേപാൾ, ഭൂട്ടാൻ, പാകിസ്​താൻ എന്നിവയൊക്കെയും ഇന്ത്യ​െയക്കാൾ ബഹുദൂരം പിറകിൽ നിൽക്കുന്നു​. പാകിസ്​താനിൽ ഇത്​ പകുതിയേ വരൂ.

രാജ്യാന്തര വിപണിയിൽ അസംസ്​കൃത എണ്ണക്ക്​ 71 ഡോളറാണ്​ കഴിഞ്ഞ ദിവസം വില. മേയ്​ 2019നു ശേഷം ആദ്യമായാണ്​ വില ഇത്രയുമെത്തുന്നത്​. കോവിഡ്​ കാരണം നിയന്ത്രണത്തിലായ ഉൽപാദനം ലോകം തിരിച്ചെത്തിയിട്ടും പൂർണ തോതിലാകാതത്താണ്​ വില കൂടാനിടയാക്കിയത്​. 2020ൽ ആഗോള ഉപഭോഗം കുത്തനെ ഇടിഞ്ഞപ്പോൾ പെട്രോളിയം വില 19 ഡോളർ വരെ എത്തിയിരുന്നുവെന്നതും ശ്രദ്ധിക്കണം. കഴിഞ്ഞ ഫെബ്രുവരിക്കും ഏപ്രിലിനുമിടയിൽ സൗദി അറേബ്യ പ്രതിദിന എണ്ണ ഉൽപാദനം 10 ലക്ഷം ബാരൽ കുറച്ചിരുന്നു. അതിൽ നാലിലൊന്നു മാത്രമേ ഇതിനകം പുനഃസ്​ഥാപിച്ചുള്ളൂ. അവശേഷിച്ച ഏഴര ലക്ഷം ബാരൽ ജൂൺ, ജൂലൈ മാസങ്ങളിലായി പൂർണമാക്കുമെന്നാണ്​ സൂചന. മറ്റു ഒപെക്​ രാജ്യങ്ങൾ കൂടി പരിഗണിച്ചാൽ ​ജൂണിൽ മൂന്നര ലക്ഷം ബാരലും ജൂലൈയിൽ 4,41,000 ബാരലും പുനഃസ്​ഥാപിക്കാനുണ്ട്​. ഇവ പൂർണമാകുംവരെ അന്താരാഷ്​ട്ര വിപണിയിൽ വില വർധനയും തുടർന്നേക്കും. അത്​ അവസരമായി കണ്ട്​ ഇന്ത്യയിലും വില കൂട്ടും.

അന്താരാഷ്​ട്ര വിപണിയിലെ വില കൂടുന്നതിന്​ ആനുപാതികമായി ഇന്ത്യയിലും വില ഉയർന്നാൽ രാജ്യത്ത്​ പണപ്പെരുപ്പം മുതൽ വിലക്കയറ്റം വരെ കാത്തിരിക്കുന്നത്​ ഗുരുതരമായ അനവധി പ്രശ്​നങ്ങൾ. കോവിഡിൽ ഗ്രാമീണ ഇന്ത്യ നിശ്​ചലമാകുകയും കൂടുതൽ ദരിദ്രമാകുകയും ചെയ്​തിട്ടും അതുപരിഗണിക്കാതെ വിലകൂട്ടൽ യജ്​ഞം തുടരുന്നതിനെതിരെ കോടതികൾ വരെ രംഗത്തെത്തിയിട്ടുണ്ട്​. അതുപക്ഷേ, അറിയാത്ത മട്ടിൽ നടപടികൾക്ക്​ മടിച്ചുനിൽക്കുകയാണ്​ സർക്കാറുകൾ.