പിടിവിട്ട്​ ഇന്ധന വില; അഞ്ച്​ സംസ്​ഥാനങ്ങളിൽ പെട്രോൾ വില നൂറ്​ കടന്നു

ന്യൂഡൽഹി: ഇന്ധന വില പിടിവിട്ടു കുതിക്കുന്നു. രാജ്യത്തെ അഞ്ച്​ സംസ്​ഥാനങ്ങളിൽ പെട്രോൾ വില ലിറ്ററിന്​ നൂറ്​ കടന്നു. ഡൽഹിയിൽ ഒരു ലിറ്റർ പെട്രോളിന്​ 95 രൂപയായി. ഞായറാഴ്​ച പെട്രോളിന്​ 21 പൈസയും ഡീസലിന്​ 20 പൈസയുമാണ്​ കൂട്ടിയത്​. മേയ്​​ നാലിനു ശേഷമുണ്ടായ 20ാം വർധനയാണിത്​.

ഇതോടെ പലയിടത്തും ഇന്ധന വില റെക്കോഡ്​ ഉയരത്തിലെത്തി. രാജസ്​ഥാൻ, മധ്യപ്രദേശ്​, മഹാരാഷ്​ട്ര, ആന്ധ്രപ്രദേശ്​, തെലങ്കാന, കേന്ദ്ര ഭരണപ്രദേശമായ ലഡാക്ക്​ എന്നിവിടങ്ങളിലാണ്​ പെട്രോൾ ലിറ്ററിന്​ നൂറ്​ കടന്നത്​. ഡൽഹിയിൽ ഡീസൽ വില ലിറ്ററിന്​ 86 രൂപ കടന്നു. അന്താരാഷ്​ട്ര എണ്ണ വിലയും കൂടുകയാണ്​. രണ്ടു വർഷത്തിനിടെ ഒരു ബാരൽ ബെൻറ്​ ക്രൂഡ്​ ഓയിൽ വില 72 ഡോളറിന്​ (5267രൂപ) അടുത്തെത്തി.

ഇന്ധനത്തിന്​ ഏറ്റവും കൂടുതൽ വിൽപന നികുതി ചുമത്തുന്ന സംസ്​ഥാനത്താണ്​ വിലവർധനയും കൂടുതൽ. രാജസ്​ഥാനാണ്​​ ഇന്ധനത്തിന്​ ഏറ്റവും കൂടുതൽ വിൽപനനികുതിയുള്ള സംസ്​ഥാനം. മധ്യപ്രദേശ്​, മഹാരാഷ്​ട്ര, ആന്ധ്രപ്രദേശ്​, തെലങ്കാന എന്നീ സംസ്​ഥാനങ്ങൾ​ തൊട്ടുപിന്നിലും. രാജ്യത്താദ്യമായി പെട്രോൾ വില നൂറ്​ കടന്ന മെട്രോ നഗരം​ മുംബൈയാണ്​. മേയ്​ 29ന്​ നൂറ്​ കടന്ന നഗരത്തിൽ ഇന്നലത്തെ വില 101.30 രൂപയാണ്​. ഡീസൽ 93.35 രൂപയും. 20 പ്രാവശ്യത്തെ വർധന കൊണ്ട്​ പെട്രോളിന്​ കൂടിയത്​ 4.69 രൂപയും ഡീസലിന്​ കൂടിയത്​ 5.28 രൂപയുമാണ്​.