കോടതിയെ തെറ്റിദ്ധരിപ്പിച്ചു; ആദായനികുതി വകുപ്പിന്​ 10 ലക്ഷം പിഴ

ന്യൂഡൽഹി: ​സുപ്രീംകോടതിയെ തെറ്റിദ്ധരിപ്പിച്ചതിന്​ ആദായ നികുതി വകുപ്പിന്​ 10 ലക്ഷം രൂപ പിഴ ചുമത്തി. ജസ്​റ്റിസ്​ മദൻ ലോകുർ അധ്യക്ഷനായ ബെഞ്ചാണ്​ ഗാസിയാബാദ്​ ആദായ നികുതി കമീഷണർക്ക്​ പിഴ ചുമത്തിയത്​. എസ്​.എ നസീർ, ദീപക്​ ഗുപ്​ത തുടങ്ങിയവരാണ്​ ബെഞ്ചിലെ മറ്റംഗങ്ങൾ. 

അലഹാബാദ്​ ​ഹൈകോടതി വിധിക്കെതിരെയാണ്​ ആദായ നികുതി വകുപ്പ്​ സുപ്രീംകോടതിയെ സമീപിച്ചത്​. എന്നാൽ, ഇതേ കേസ്​ 2012 മുതൽ തന്നെ സുപ്രീംകോടതിയുടെ പരിഗണനയിലുണ്ട്​. ഇക്കാര്യം ശ്രദ്ധിക്കാതെ അപ്പീൽ നൽകി സുപ്രീംകോടതിയെ തെറ്റിദ്ധരിപ്പിക്കാൻ ശ്രമിച്ചതിനാണ്​ കോടതിയുടെ പിഴ ശിക്ഷ.

ശ്രദ്ധയില്ലാതെ കേന്ദ്രസർക്കാറും ആദായ നികുതി വകുപ്പും കേസ്​ കൈകാര്യം ചെയ്​തത്​ ഞെട്ടലുണ്ടാക്കുന്നുവെന്നും സുപ്രീംകോടതി നിരീക്ഷിച്ചു.