ലോക്​ഡൗൺ പിൻവലിച്ച്​ 10 ദിവസത്തിന്​ ശേഷം പത്ത്​, പ്ലസ് ടു പരീക്ഷകൾ നടത്തും -​സി.ബി.എസ്.ഇ

ന്യൂഡൽഹി: കോവിഡ്​ വ്യാപനം മൂലം മാറ്റിവെച്ച പത്ത്​, പ്ലസ്​ടു പരീക്ഷകൾ നടത്തുന്നതിന്​ സാവകാശം അനുവദിച്ച്​ സി. ബി.എസ്.ഇ. രാജ്യവ്യാപകമായ ലോക്​ഡൗൺ പിൻവലിച്ച്, കുറഞ്ഞതു പത്ത് ദിവസങ്ങൾക്കു ശേഷമേ 10, പ്ലസ് ടു ക്ലാസുകളിലെ പരീക്ഷ കൾ നടത്തൂവെന്നു സി.ബി.എസ്.ഇ അറിയിച്ചു. നടത്തിയ പരീക്ഷകളുടെ മൂല്യനിർണയം അധ്യാപകർ വീട്ടിൽ നടത്തും. കോവിഡ് വ്യാപന ത്തെ തുടർന്ന്​ മാർച്ച് 18നാണ് ഉത്തരക്കടലാസുകളുടെ മൂല്യനിർണയം നിർത്തി വെച്ചത്.

ഇ​േൻറണൽ മാർക്കിൻെറ അടിസ്ഥാനത്തിൽ 10, പ്ലസ്​ ടു വിദ്യാർഥികൾക്ക്​ സ്ഥാനക്കയറ്റം നൽകണമെന്ന്​ കേന്ദ്രസർക്കാറിനോട്​ സംസ്ഥാനസർക്കാറുകൾ​ ആവശ്യപ്പെട്ടിരുന്നു. പരീക്ഷകൾ സംബന്ധിച്ച് നിരവധി ഊഹാപോഹങ്ങൾ ഉണ്ട്. എന്നാൽ ഏപ്രിൽ ഒന്നിന്​ ഇറക്കിയ ഉത്തരവ്​ പ്രകാരമെ പരീക്ഷ നടത്തൂവെന്നും സി.ബി.എസ്.ഇ അറിയിച്ചു. 41 വിഷയങ്ങളിൽ പ്രധാനപ്പെട്ട 29 എണ്ണത്തിൽ മാത്രമേ പരീക്ഷ നടത്തൂ. 10 ദിവസം മുമ്പ്​ എങ്കിലും പരീക്ഷാ തീയതി പ്രഖ്യാപിക്കുമെന്നും സി.ബി.എസ്.ഇ പുറത്തുവിട്ട സർക്കുലറിൽ വ്യക്തമാക്കി.

കഴിഞ്ഞ ദിവസം കേന്ദ്ര മാനവവിഭവശേഷി മന്ത്രി രമേശ് പൊഖ്രിയാലുമായി സംസ്ഥാന വിദ്യാഭ്യാസ മന്ത്രിമാർ ചർച്ച നടത്തിയിരുന്നു. ഇ​േൻറണൽ മാർക്കിൻെറ അടിസ്ഥാനത്തിൽ 10,12 ക്ലാസ് വിദ്യാർഥികൾക്ക് സ്ഥാനകയറ്റം നൽകുക, എല്ലാ ക്ലാസുകളുടേയും കരിക്കുലം 30 ശതമാനം വെട്ടിക്കുറക്കുക, ജെ.ഇ.ഇ, നീറ്റ്​ തുടങ്ങിയ പരീക്ഷകളുടെ സിലബസ്​ ചുരുക്കുക തുടങ്ങിയ നിർദേശങ്ങളാണ്​ കേന്ദ്രമന്ത്രിക്ക്​ മുമ്പാകെ സമർപ്പിക്കപ്പെട്ടത്​.