കർഷകരുടെ സമാധാനപരമായ സത്യാഗ്രഹം രാഷ്​ട്ര താൽപര്യം -രാഹുൽ ഗാന്ധി

ന്യൂഡൽഹി: അന്നദാതാക്കളുടെ സമാധാനപരമായ സത്യാഗ്രഹം രാഷ്​ട്ര താൽപര്യമുള്ളതാണെന്ന്​ ​കോൺഗ്രസ്​ നേതാവ്​ രാഹുൽ ഗാന്ധി. രാജ്യമെമ്പാടും കർഷകർ റോഡ്​ ഉപരോധ സമരം ആഹ്വാനം ചെയ്​തതിന്​ പിന്നാലെയാണ്​ രാഹുൽ ഗാന്ധിയുടെ പ്രതികരണം.

'അന്നദാതാക്കളുടെ സമാധാനപരമായ സത്യാഗ്രഹം രാഷ്​ട്ര താൽപര്യമുള്ളതാണ്​. ഈ മൂന്ന്​ നിയമങ്ങളും കർഷകർക്ക്​ മാത്രമല്ല, രാജ്യത്തെ ജനങ്ങൾക്ക്​ മുഴുവൻ ഹാനികരമാകും. മുഴുവൻ പിന്തുണയും' -രാഹുൽ ട്വീറ്റ്​ ചെയ്​തു.

ഫെബ്രുവരി ആറിന്​ രാജ്യമെമ്പാടും കർഷകർ ആഹ്വാനം ചെയ്​ത റോഡ്​ തടയൽ സമരം പുരോഗമിക്കുകയാണ്​. വൈകുന്നേരം മൂന്നുവരെയാണ്​ സമരം. ദേശീയ പാതകളും സംസ്​ഥാന പാതകളും കർഷകർ ഉപരോധിക്കും. റോഡ്​ തടയൽ സമരത്തിന്​ മുന്നോടിയായി നിരവധി നേതാക്കളെ പൊലീസ്​ കസ്റ്റഡിയിലെടുത്തിരുന്നു.

വൻ പൊലീസ്​ സന്നാഹത്തെയാണ്​​ ഡൽഹിയിൽ വിന്യസിച്ചിരിക്കുന്നത്​. കൂടാതെ ചെ​ങ്കോട്ട ഉൾപ്പെടെ പ്രധാന സ്​ഥലങ്ങളിൽ സുരക്ഷ ശക്തമാക്കുകയും ചെയ്​തു.