ആന്ധ്രയിൽ കിങ്​ മേക്കറാവുക ജനസേനയെന്ന്​ പവൻ കല്യാൺ

ഹൈദരാബാദ്​: ആന്ധ്രപ്രദേശ്​ തെരഞ്ഞെടുപ്പിൽ കിങ്​ മേക്കറാവുക ജനസേനയെന്ന് നടനും​ നേതാവുമായ പവൻ കല്യാൺ. അടുത്ത തെരഞ്ഞെടുപ്പിൽ ടി.ഡി.പിയും വൈ.എസ്​.ആർ കോൺഗ്രസും തമ്മിലുള്ള പോരാട്ടത്തിന്​ ശേഷം ആര്​ സംസ്ഥാനം ഭരിക്കണമെന്നത്​ ജനസേന തീരുമാനിക്കുമെന്നും പവൻ കല്യാൺ പറഞ്ഞു.

കർണാടകക്ക്​ സമാനമാവും ആന്ധ്രയിലേയും രാഷ്​ട്രീയ സാഹചര്യം. ആര്​ സർക്കാർ രുപീകരിക്കണമെന്ന്​ ജനസേന തീരുമാനിക്കും. കഴിഞ്ഞ തെരഞ്ഞെടുപ്പിൽ ടി.ഡി.പിക്ക്​​ 14 മുതൽ 16 ശതമാനം വരെ വോട്ട്​ വിഹിതത്തിൽ കുറവുണ്ടായെന്നും പവൻ കല്യാൺ ചൂണ്ടിക്കാട്ടി.

2009ലെ തെരഞ്ഞെടുപ്പിൽ പ്രജാരാജ്യം പാർട്ടി രുപീകരിച്ച്​ മൽസരിച്ചപ്പോൾ 25 ശതമാനം വോട്ടുകൾ നേടാൻ കഴിഞ്ഞിരുന്നു. ഇക്കുറി 175 സീറ്റുകളിലും മൽസരിക്കാനാണ്​ പാർട്ടി തീരുമാനമെന്നും പവൻ കല്യാൺ വ്യക്​തമാക്കി.