യു.പിയിൽ കാണാതായ മൂന്നുവയസ്സുകാരിയുടെ മൃതദേഹം മൃഗങ്ങൾ ഭക്ഷിച്ച നിലയിൽ

ലഖിംപുര്‍ ഖേരി: ഉത്തര്‍പ്രദേശിലെ ലഖിംപുര്‍ ഖേരി ജില്ലയില്‍നിന്ന് കാണാതായ മൂന്ന് വയസ്സുകാരിയുടെ മൃതദേഹം പകുതിയിലധികം മൃഗങ്ങള്‍ ഭക്ഷിച്ച നിലയില്‍ വീടിന്​ സമീപത്തെ കുറ്റിക്കാട്ടില്‍ കണ്ടെത്തി. വ്യാഴാഴ്ച പുലര്‍ച്ചെയാണ്​ കുട്ടിയെ കാണാതായത്​. തുടർന്ന്​ നടത്തിയ അന്വേഷണത്തിലാണ്​ മൈഗല്‍ഗഞ്ച് പ്രദേശത്തെ കുറ്റിക്കാട്ടിൽ നിന്ന്​ മൃതദേഹം ലഭിച്ചത്​. കുടിയുടെ വീട്ടില്‍നിന്ന് 200 മീറ്റര്‍ മാത്രം അകലെയുള്ള കുറ്റിക്കാട്ടിലായിരുന്നു മൃതദേഹം.

മൃതദേഹത്തിന്‍റെ ഭാഗങ്ങൾ പല മൃഗങ്ങള്‍ ഭക്ഷിച്ചുവെന്നാണ് സൂചനയെന്ന്​ വാർത്താ ഏജൻസികൾ റിപ്പോർട്ട്​ ചെയ്യുന്നു. കുട്ടിയുടെ കഴുത്തിന് താഴെയുള്ള മിക്ക ശരീരഭാഗങ്ങളും മൃഗങ്ങള്‍ ഭക്ഷിച്ചുവെന്നാണ്​ റിപ്പോർട്ട്​. അതേസമയം, നിരവധി കുടുംബങ്ങള്‍ താമസിക്കുന്ന രാംലീല ഗ്രൗണ്ടിലെ വീട്ടില്‍നിന്ന് മൂന്ന് വയസ്സുകാരിയെ മൃഗങ്ങള്‍ എങ്ങനെ എടുത്തുകൊണ്ടുപോയി കുറ്റിക്കാട്ടില്‍ എത്തിച്ചു എന്നത്​ അത്​ഭുതപ്പെടുത്തുന്നെന്ന്​ ഡിവിഷണല്‍ ഫോറസ്റ്റ് ഓഫീസര്‍ സമീര്‍ കുമാര്‍ പറഞ്ഞു.

മൃതദേഹം കണ്ടെത്തിയ സ്ഥലത്ത് കുറുക്കന്മാരുടെ കാല്‍പ്പാടുകള്‍ പതിഞ്ഞിട്ടുണ്ട്. എന്നാല്‍, കുറുക്കന്മാര്‍ ഇത്തരത്തില്‍ ആക്രമിച്ച്​ കൊല്ലാറില്ലെന്ന്​ അദ്ദേഹം ചൂണ്ടിക്കാട്ടി. മൃതദേഹം ലഭിച്ച സ്ഥലത്ത് വനം വകുപ്പ് രണ്ട് ക്യാമറകള്‍ സ്ഥാപിച്ചിട്ടുണ്ട്​. കുട്ടിയെ ആക്രമിച്ച മൃഗം ഒന്നോ രണ്ടോ​ ദിവസത്തിനകം ഇവിടെ എത്തിയേക്കുമെന്ന പ്രതീക്ഷയിലാണിത്​. ഏത്​ മൃഗമാണ്​ കുട്ടിയെ ആദ്യംഎടുത്തുകൊണ്ടുപോയതെന്നും ആക്രമിച്ചതെന്നും അറിയാനുള്ള ശ്രമത്തിലാണ്​ വനം വകുപ്പ്​. പ്രദേശത്ത്​ താമസിക്കുന്നവർ അതീവ ജാഗ്രത പാലിക്കണമെന്നും കുട്ടികളെ വീടിന് പുറത്തിറങ്ങാന്‍ അനുവദിക്കരുതെന്നും അധികൃതര്‍ നിര്‍ദ്ദേശിച്ചിട്ടുണ്ട്.