'ഡെലിവറി ബോയ്​ സംഭവത്തിൽ 'സൊമാറ്റോ' സത്യം കണ്ടെത്തണം; തെറ്റുകാരിയെങ്കിൽ യുവതിക്ക്​ ശിക്ഷ നൽകാൻ സഹായിക്കണം'

ബംഗളൂരു: സൊമാറ്റോ ഡെലിവറി ബോയ്​ ആക്രമിച്ചെന്ന്​ യുവതി പൊലീസിൽ പരാതി നൽകിയ സംഭവത്തിൽ ഡെലിവറി ബോയ്ക്ക്​ പിന്തുണയുമായി ബോളിവുഡ്​ നടി പരിണീതി ചോപ്ര. സംഭവം ​അന്വേഷിച്ച്​ സത്യം കണ്ടെത്തണമെന്നും ഡെലിവറി ബോയ്​ നിരപരാധിയാണെങ്കിൽ സംശയ മുനയിലുള്ള സ്​ത്രീക്ക്​ ശിക്ഷ വാങ്ങിക്കൊടുക്കാൻ തയാറാകണമെന്നും പരിണീതി ആവശ്യപ്പെട്ടു. 'ഇത്​ മനുഷ്യത്വരഹിതമാണ്​, നാണക്കേടും ഹൃദയഭേദകവുമാണ്​''- നടി ട്വീറ്റ്​ ചെയ്​തു. ഡെലിവറി ബോയ്​ സത്യം കണ്ടെത്തണമെന്നാവശ്യപ്പെട്ട്​ ഡെലിവറി ബോയിയുടെ വിഡിയോയും ഇതോടൊപ്പം ട്വിറ്ററിൽ ചേർത്തിട്ടുണ്ട്​.

ഓൺലൈനിൽ ഓർഡർ ചെയ്ത ഭക്ഷണം എത്തിക്കാൻ വൈകിയതിനെതുടർന്നുണ്ടായ തർക്കത്തെ തുടർന്ന്​ കാമരാജ്​ ത​െന്‍റ മൂക്കിന് ഇടിച്ച്​ ചോരവരുത്തിയെന്നായിരുന്നു കണ്ടൻറ് ക്രിയേറ്ററും മേക്കപ്പ് ആർട്ടിസ്​റ്റുമായ ഹിതേഷ ചന്ദ്രാനെ എന്ന യുവതിയുടെ പരാതി. മൂക്കിൽനിന്ന്​ ചോരയൊലിച്ചുകൊണ്ട് യുവതി സാമൂഹിക മാധ്യമങ്ങളിൽ വീഡിയോ പോസ്​റ്റ് ചെയ്തതോടെയാണ് സംഭവം പുറംലോമറിയുന്നത്. എന്നാൽ, തന്നെ ചെരുപ്പൂരി അടിക്കുന്നതിനിടെ അവരുടെ തന്നെ മോതിരം മൂക്കിൽ തട്ടിയാണ്​ യുവതിക്ക്​ പരിക്കേറ്റതെന്ന്​ ഡെലിവറി ബോയ്​ കാമരാജ്​ ​ മൊഴി നൽകി. യുവതിയാണ്​ തന്നെ ആദ്യം മർദിച്ചതെന്നും അധിക്ഷേപിച്ചതെന്നും കാമരാജ്​ പിന്നീട്​ മാധ്യമങ്ങളോട്​ പറഞ്ഞു.

Zomato India - PLEASE find and publicly report the truth.. If the gentleman is innocent (and I believe he is), PLEASE help us penalise the woman in question. This is inhuman, shameful and heartbreaking .. Please let me know how I can help.. #ZomatoDeliveryGuy @zomato @zomatoin

— Parineeti Chopra (@ParineetiChopra) March 14, 2021

"റോഡ്​ പണി നടക്കുന്നത്​ കാരണം പോകുന്ന വഴിയിൽ വൻ ഗതാഗതക്കുരുക്കായിരുന്നു. അവരുടെ അപ്പാർട്ട്മെന്‍റിന്‍റെ വാതിൽക്കൽ എത്തിയ ശേഷം, വൈകിയതിന്​ ഞാൻ ആദ്യമേ ക്ഷമ ചോദിച്ചു. തുടർന്ന്​ ഭക്ഷണം കൈമാറി. കാഷ്​ ഓൺ ഡെലിവറിയായിരുന്നു അവർ തെരഞ്ഞെടുത്തത്. അതിനാൽ പണത്തിനായി കാത്തുനിന്നു. എന്നാൽ, അവർ തരാൻ കൂട്ടാക്കിയില്ല. എന്നുമാത്രമല്ല, എ​ന്നോട്​ വളരെ പരുഷമായി സംസാരിച്ചു..' - കാമരാജ്​ ദി ന്യൂസ് മിനിറ്റിനോട്​ പറഞ്ഞു.

"അവർ തന്നില്ലെങ്കിൽ എന്‍റെ അക്കൗണ്ടിൽനിന്ന്​ പണം നഷ്ടപ്പെട​ുമെന്നതിനാൽ പണം നൽകണമെന്ന് ഞാൻ അപേക്ഷിച്ചു. ഈ സമയത്ത്, എന്നെ 'അടിമ'യെന്ന്​ എന്ന് വിളിച്ച്​ അധിക്ഷേപിച്ചു. എന്നിട്ട് 'തനിക്കെന്ത്​ ചെയ്യാൻ കഴിയും?' എന്നും ചോദിച്ചു. അതിനിടെ അവരുടെ അഭ്യർത്ഥന പ്രകാരം ഓർഡർ റദ്ദാക്കിയതായി സോമാറ്റോയിൽനിന്ന്​ എനിക്ക്​ അറിയിപ്പ്​ ലഭിച്ചു. തുടർന്ന്​ ഭക്ഷണം തിരികെ നൽകാൻ ഞാൻ ആവശ്യപ്പെട്ടെങ്കിലും അവർ സഹകരിച്ചില്ല. ഒടുവിൽ ക്ഷമകെട്ട്​ പോകാനൊരുങ്ങിയപ്പോൾ ഹിതേഷ ഹിന്ദിയിൽ ആക്ഷേപം ചൊരിഞ്ഞു. തുടർന്ന്​ അപ്രതീക്ഷിതമായി ചെരിപ്പൂരി അടിക്കാൻ തുടങ്ങി. തടയാൻ ശ്രമിക്കുന്നതിനിടെ അവരുടെ മോതിരം അബദ്ധത്തിൽ സ്വന്തം മൂക്കിൽ തട്ടിയാണ്​ ചോര വന്നത്​ -കാമരാജ്​ കൂട്ടിച്ചേർത്തു. രണ്ട് വർഷത്തിലേറെയായി ഈ ജോലി ചെയ്യുന്ന എനിക്ക് ഇത്തരത്തിലുള്ള അനുഭവം ആദ്യാമായിട്ടാണെന്നും അദ്ദേഹം പറഞ്ഞു.

ഒരാഴ്​ച മുമ്പ്​ നടന്ന സംഭവം​ കഴിഞ്ഞ ബുധനാഴ്ച ഹിതേഷയാണ്​ സോഷ്യൽ മീഡിയ വഴി പുറംലോകത്തെത്തിച്ചത്​. സൊമാറ്റോ ഡെലിവറി ബോയ്​ ത​െന്‍റ വീട്ടിൽ അതിക്രമിച്ച് കയറി ആക്രമിച്ചുവെന്നായിരുന്നു ആരോപണം. ''വൈകീട്ട് 3.30ഒാടെ സൊമാറ്റോയിൽ ഭക്ഷണം ഒാർഡർ ചെയ്ത 4.30 കഴിഞ്ഞിട്ടും എത്തിയില്ല. ഇതോടെ സൊമാറ്റോ കസ്​റ്റമർ കെയറുമായി ബന്ധപ്പെട്ട് ഒാർഡർ കാൻസൽ ചെയ്യാനോ അതല്ലെങ്കിൽ തുക തിരിച്ചുനൽകാനോ ആവശ്യപ്പെട്ടു. ഇതിനിടയിൽ ഭക്ഷണവുമായി ഡെലിവറി ബോയ്​ എത്തി. വൈകിയതിനാൽ ഒാർഡർ വേണ്ടെന്നും കസ്​റ്റമർ കെയറുമായി സംസാരിക്കുകയാണെന്നും അറിയിച്ചെങ്കിലും തിരിച്ചുപോകാതെ ബലമായി വാതിൽ തുറന്നു. അകത്ത് കയറാൻ യുവാവ്​ ശ്രമിച്ചപ്പോഴാണ്​ താൻ ചെരുപ്പുകൊണ്ട് അടിക്കാൻ തുനിഞ്ഞത്​. അപ്പോൾ യുവാവ് മുഖത്ത് ഇടിക്കുകയായിരുന്നു'' -എന്നായിരുന്നു ഹിതേഷയുടെ വെളിപ്പെടുത്തൽ.

സംഭവത്തെ തുടർന്ന്​ കാമരാജിനെ ജോലിയിൽനിന്ന്​ പുറത്താക്കിയതായി സൊമാറ്റോ അറിയിച്ചിരുന്നു. യുവതിയുടെ പരാതിയിൽ ഇലക്ട്രോണിക് സിറ്റി പൊലീസ് കേസെടുക്കുകയും കമാരാജിനെ അറസ്റ്റ്​ ചെയ്യുകയും ചെയ്​തിരുന്നു.

എന്നാൽ, കഥ മാറിയതോടെ ഇരുവരെയും പിന്തുണച്ച്​ സൊമാറ്റോ രംഗത്തെത്തി. 5,000 ഓർഡർ എത്തിച്ചുനൽകിയ ഏറ്റവും മികച്ച റേറ്റിങ്​ ഉള്ള ഡെലിവറി ബോയ്​ ആണ്​ കാമരാജെന്ന്​ സൊമാറ്റൊ സ്​ഥാപകൻ ദീപീന്ദർ ഗോയൽ പറഞ്ഞു. യുവതിയുടെ ആശുപത്രി ചെലവ്​ വഹിക്കുമെന്നും കമ്പനി അറിയിച്ചു. ഒപ്പം കാമരാജി​െൻറ മെഡിക്കൽ ചെലവും ഏറ്റെടുക്കും.