ഗുർമീതിന്‍റെ വളർത്തുമകൾ ഹണിപ്രീത്​ അറസ്​റ്റിൽ

ചണ്ഡിഗഢ്​​: ബലാത്സംഗക്കേസിൽ ജയിലിൽ കഴിയുന്ന ദേര സച്ചാ സൗധ തലവൻ ഗുർമീത്​ റാം റഹീം സിങ്ങി​​െൻറ വളർത്തുമകൾ ഹണിപ്രീത്​ ഇൻസാൻ അറസ്​റ്റിൽ. ഇവരോടൊപ്പമുണ്ടായിരുന്ന സ്​ത്രീയെയും കസ്​റ്റഡിയിലെടുത്തു. 

ഒരുമാസത്തിലേറെയായി ഒളിവിൽ കഴിയുന്ന ഹണിപ്രീതിനെ പഞ്ചാബിലെ സിരക്​പുർ-പട്യാല റോഡിൽനിന്നാണ്​ ഹരിയാന പൊലീസി​​െൻറ പ്രത്യേക അന്വേഷണ സംഘം​ പിടികൂടിയത്​. ആഗസ്​റ്റ്​ 25ന്​ സി.ബി.​െഎ പ്രത്യേക കോടതി ഗുർമീതി​​െൻറ ശിക്ഷാവിധി പ്രഖ്യാപിച്ച ഉടൻ പഞ്ച്​കുളയിൽ അരങ്ങേറിയ അതിക്രമവുമായി ബന്ധപ്പെട്ടാണ്​ ഹണിപ്രീതി​​െൻറ അറസ്​റ്റ്​. ഇതേ കേസിൽ പൊലീസ്​ 43 പേരെകൂടി അന്വേഷിക്കുന്നുണ്ട്​. അക്രമത്തിൽ 41 പേർ കൊല്ലപ്പെടുകയും നിരവധി പേർക്ക്​ പരിക്കേൽക്കുകയും ചെയ്​തിരുന്നു.  

ഹണിപ്രീതിനെ പഞ്ച്​കുളയിൽ എത്തിച്ച്​ ചോദ്യംചെയ്യുകയാണെന്ന്​ പൊലീസ്​ കമീഷണർ എ.സി. ചൗള പറഞ്ഞു. ഇവർക്ക്​ ഒളിവിൽ കഴിയാൻ സഹായം നൽകിയവരെയും അറസ്​റ്റ്​ ചെയ്യുമെന്ന്​ അദ്ദേഹം വ്യക്​തമാക്കി. ഹണിപ്രീതിനെ ബുധനാഴ്​ച കോടതിയിൽ ഹാജരാക്കും. ഇവർക്കെതിരെ പൊലീസ്​ ലുക്കൗട്ട്​ നോട്ടീസും അറസറ്റ്​ വാറൻറും പുറപ്പെടുവിച്ചിരുന്നു.