ജൂ​ൈ​ല ഒന്നുമുതൽ പാൻ എടുക്കാനും ആധാർ നിർബന്ധം

ന്യൂഡൽഹി: ആദായനികുതി റി​േട്ടൺ സമർപ്പിക്കുന്നതിനും ജൂലൈ ഒന്നുമുതൽ പുതിയ പാൻകാർഡ്​ എടുക്കാനും ആധാർ നിർബന്ധമാണെന്ന്​ കേന്ദ്ര പ്രത്യക്ഷനികുതിബോർഡ്​(സി.ബി.ഡി.ടി)അറിയിച്ചു. ആദായനികുതി റി​േട്ടൺ ഫയൽ ചെയ്യു​േമ്പാൾ ആധാറുള്ളവർ പാൻകാർഡുമായി  ബന്ധിപ്പിക്കണമെന്ന്​ സുപ്രീംകോടതി ഉത്തരവിട്ടിരുന്നു. ഇത്​ പ്രാബല്യത്തിലാക്കാനുള്ള നടപടികളുടെ  ഭാഗമായാണ്​ ​ സി.ബി.ഡി.ടി നിർദേശം​.

ജൂലൈ ഒന്നിനകം പാൻ ലഭിക്കുന്നവർ ആധാർ ഉള്ളവരാണെങ്കിൽ അക്കാര്യം ആദായനികുതി വകുപ്പിനെ അറിയിക്കണം. എന്നാൽ, ഇതുവരെ ആധാർ എടുക്കാത്തവരുടെ പാൻ തൽക്കാലം റദ്ദാക്കില്ല. അതിനാൽ ആദായനികുതി നിയമവുമായി ബന്ധപ്പെട്ട മറ്റ്​ തടസ്സങ്ങൾ നേരിടേണ്ടിവരില്ലെന്ന്​ ​സി.ബി.ഡി.ടി വിശദീകരിച്ചു. പാൻ റദ്ദാക്കപ്പെട്ടാൽ ഒരുവ്യക്​തിക്ക്​ സാധാരണ ബാങ്ക്​^പണ ഇടപാടുകൾ പോലും സാധിക്കാതെ വരുമെന്നതിനാലാണ്​ ഇൗ  ഇളവ്​ നൽകുന്നതെന്നും സി.ബി.ഡി.ടി വ്യക്​തമാക്കി. 

ആദായനികുതിറി​േട്ടണിന്​ ആധാർ നിർബന്ധമാക്കിയ സർക്കാർനിയമം സുപ്രീംകോടതി ഭാഗികമായി ശരിവെച്ചിട്ടുണ്ട്​. കഴിഞ്ഞദിവസത്തെ സുപ്രീംകോടതി ഉത്തരവ്​ ധന^നിയമ മന്ത്രാലയങ്ങളും ആദായനികുതിവകുപ്പും പ്രത്യക്ഷനികുതി ബോർഡും വിലയിരുത്തിയതി​​​െൻറ അടിസ്​ഥാനത്തിലാണ്​ ഇൗ നിർദേശങ്ങളെന്നും സി.ബി.ഡി.ടി അറിയിച്ചു. ആധാർ സ്വകാര്യതയുടെ ലംഘനമാണോയെന്ന്​ ഭരണഘടനബെഞ്ച്​ തീർപ്പുകൽപിക്കുന്നതുവരെ ആധാർ നിർബന്ധമാക്കരുതെന്ന്​ വെള്ളിയാഴ്​ചത്തെ വിധിയിൽ സുപ്രീംകോടതി നിർദേശിച്ചിരുന്നു​.