സമുദ്രാതിർത്തി ലംഘിച്ച പാക് ബോട്ട് ഗുജറാത്ത് തീരത്തുനിന്ന് പിടികൂടി; പത്തുപേർ കസ്റ്റഡിയിൽ

അഹ്മദാബാദ്: ഇന്ത്യൻ സമുദ്രാതിർത്തി ലംഘിച്ച പാകിസ്താൻ ബോട്ട് ഗുജറാത്ത് തീരത്തുനിന്ന് പിടികൂടി. ബോട്ടിലുണ്ടായിരുന്ന 10 പാക് പൗരന്മാരെ കോസ്റ്റ്ഗാർഡ് കസ്റ്റഡിയിലെടുക്കുകയും ചെയ്തു.

ശനിയാഴ്ച രാത്രി കോസ്റ്റ് ഗാർഡ് നടത്തിയ തിരച്ചിലിനിടയിലാണ് ബോട്ട് ​കണ്ടെത്തുന്നത്. 'യാസീൻ' എന്ന പേരുള്ള പാക് ബോട്ടാണ് പിടികൂടിയത്.

ഇന്ത്യൻ സമുദ്രാതിർത്തിയുടെ 6-7 മൈൽ ഉള്ളിലാണ് പാകിസ്താൻ ബോട്ട് ക​ണ്ടെത്തിയത്. ഇവർ സംഭവസ്ഥലത്ത് നിന്ന് രക്ഷപ്പെടാൻ ശ്രമിച്ചെന്നും കോസ്റ്റ് ​ഗാർഡ് ഉദ്യോ​ഗസ്ഥൻ പറഞ്ഞു. രണ്ട് ടൺ മത്സ്യവും 600 ലിറ്റർ ഇന്ധനവും ബോട്ടിൽ നിന്ന് കണ്ടെടുത്തിട്ടുണ്ടെന്നും, കൂടുതൽ ചോദ്യം ചെയ്യലിനായി ബോട്ട് പോർബന്തറിലേക്ക് കൊണ്ട് വരുമെന്നും അധികൃതർ അറിയിച്ചു.