പാക്​ ഭീകരനെന്ന്​ സംശയം; ഡൽഹിയിൽ ഒരാൾ അറസ്​റ്റിൽ

ന്യൂഡൽഹി: പാക്​ ഭീകരനെ ‍ഡൽഹി പൊലീസ് സ്പെഷൽ സെൽ പിടികൂടി. കിഴക്കൻ ഡൽഹിയിലെ ലക്ഷ്മി നഗറിൽനിന്നാണ് 40കാരനായ മുഹമ്മദ് അഷ്റഫ് എന്ന അലി പിടിയിലായത്. എ.കെ 47 തോക്ക്, വെടിയുണ്ടകൾ, ഗ്രനേഡ്, രണ്ടു കൈത്തോക്കുകൾ എന്നിവ ഇയാളിൽനിന്ന്​ കണ്ടെടുത്തതായി പൊലീസ്​ പറഞ്ഞു. ഇന്ത്യൻ പൗരനാണെന്ന വ്യാജ തിരിച്ചറിയൽ രേഖ ഉപയോഗിച്ച് ഡൽഹിയിലെ ശാസ്ത്രി നഗറിലാണ് ഇയാൾ താമസിച്ചിരുന്നത്.

പാക്​ ചാരസംഘടനയായ ഐ.എസ്​.ഐ ബന്ധമുള്ളയാളാണ്​ പഞ്ചാബ് പ്രവിശ്യ സ്വദേശിയായ അലി എന്നാണ് അന്വേഷണ ഉദ്യോഗസ്ഥർക്കു ലഭിച്ച വിവരം. ഇയാൾ ബംഗ്ലാദേശ്​ വഴി ഇന്ത്യയിലെത്തി പത്ത്​ വർഷമായി ഇവിടെ സ്​ഥിരതാമസമായിരുന്നതായി പൊലീസ്​ ഡെപ്യൂട്ടി പൊലീസ്​ കമീഷണർ പ്രമോദ്​ സിങ്​ കുശാവാഹ പറഞ്ഞു.

ഇതിനകം നാലഞ്ച്​ സ്​ഥലത്ത്​ ഇയാൾ താമസിച്ചിരുന്നു. ഏറെക്കാലം ഒരിടത്ത്​ താമസിക്കാത്ത ഇയാൾ ഇവിടെനിന്ന്​ വിവാഹം കഴിച്ചതായും പൊലീസ്​ ക​െണ്ടത്തി. തിങ്കളാഴ്​ച രാത്രിയാണ്​ അലി പിടിയിലായത്​. സ്​കൂൾ പഠനശേഷം ആറുമാസം ഐ.എസ്​.ഐ പരിശീലനം നേടിയശേഷമാണ്​ ഇയാൾ ഇന്ത്യയിലെത്തിയതെന്ന്​ പൊലീസ്​ പറഞ്ഞു. നിയമവിരുദ്ധപ്രവർത്തനം തടയൽ, സ്​ഫോടകവസ്​തു, ആയുധ നിരോധന നിയമം എന്നീ വകുപ്പുകൾ ഉൾപ്പെടുത്തിയാണ്​ കേസെടുത്തത്​.