'വനത്തിന്‍റെ എൻസൈക്ലോപീഡിയ'യായ തുളസി ഗൗഡ; നട്ടത്​ ലക്ഷ​ത്തിലധികം മരങ്ങൾ

പരിസ്​ഥിതി സംരക്ഷണത്തിന്​ ലോകത്തിന്​ തന്നെ മാതൃകയാകുകയാണ്​ 72കാരിയായ കർണാടകയിലെ ഈ മുത്തശ്ശി. 'വനത്തിന്‍റെ എൻസൈക്ലോപീഡിയ' എന്നാണ്​ ഇൗ മുത്തശ്ശിയുടെ വിളിപ്പേരുതന്നെ. ആദിവാസി വയോധികയായ തുളസി ഗൗഡയുടെ പേരിനൊപ്പം ഇനി പത്മശ്രീയും ചേർക്കും. രാജ്യത്തെ സിവിലിയൻ ബഹുമതിയായ പത്​മശ്രീ തിങ്കളാഴ്ച രാഷ്​ട്രപതി രാംനാഥ്​ കോവിന്ദ്​ തുളസി ഗൗഡക്ക്​ സമ്മാനിച്ചു.

കർണാടകയിലെ ഹലക്കി ആദിവാസി ​േ​ഗാത്രത്തിൽപ്പെട്ട ദരിദ്ര കുടുംബത്തിലായിരുന്നു തുളസിയുടെ ജനനം. വിദ്യാഭ്യാസം നേടിയിട്ടില്ലാത്ത തുളസി പരമ്പരാഗത വേഷം മാത്രമാണ്​ ധരിക്കുക. ചെരിപ്പ്​ ഇടാറില്ല. പത്മ പുരസ്​കാരം വാങ്ങാനെത്തിയതും പരമ്പരാഗത വേഷത്തിൽതന്നെ. വൈവിധ്യമാർന്ന സസ്യങ്ങളെയും ചെടികളെയും കുറിച്ചുള്ള വിപുലമായ അറിവാണ്​ വനത്തിന്‍റെ എൻ​സൈക്ലോപീഡിയ എന്ന വിളിപ്പേര്​ തുളസിക്ക്​ സമ്മാനിക്കാൻ കാരണം.

തന്‍റെ 12ാം വയസുമുതൽ ലക്ഷത്തിലധികം​ മരങ്ങൾ നടുക മാത്രമല്ല, പരിപാലിക്കുകയും ചെയ്​തുപോന്നു. പ്രകൃതി സംരക്ഷണത്തോടുള്ള അർപ്പണ ബോധത്തെ തുടർന്ന്​ വനംവകുപ്പ്​ താൽകാലിക സന്നദ്ധ സേവകയായി നിയമിച്ചു. പിന്നീട്​ വനംവകുപ്പിൽതന്നെ സ്​ഥിരം ജോലിയും വാഗ്​ദാനം ചെയ്​തിരുന്നു.

72ാം വയസിലും പ്രകൃതി സംരക്ഷണമെന്ന സന്ദേശം ഉയർത്തിപ്പിടിക്കുകയാണ്​ ഈ മുത്തശ്ശി. ഇപ്പോഴും മരങ്ങൾ നടുകയും സംരക്ഷിച്ചുപോരുകയും ചെയ്യുന്നു. കൂടാതെ പുതിയ തലമുറക്ക്​ പ്രകൃതിയുടെ പാഠങ്ങളും പരിസ്​ഥിതി സംരക്ഷണത്തിന്‍റെ പ്രധാന്യവും പകർന്നുനൽകുന്നതിനായി അറിവ്​ പകർന്നു നൽകുകയും ചെയ്യുന്നു.